2011年12月27日 星期二

北平印象概要

氣候,環境

1. 對我呢啲香港仔嚟講,北平冬天真係凍,晚晚包到隻粽咁依然係寒風陣陣,成個人變咗冰條
2. 香港空氣唔好,但點都衰唔過北平,當地空氣污染係自然環境破壞(沙塵)同人爲污染(汽車,工業)嘅雜種,非常可怕,卒之搞到我感冒咗幾日,而家都未清
3. 北平地大,一個街口嘅距離,遠香港三四倍,所以市中心以外少有高樓大廈
4. 北平依舊城四方格局向外發展,加上地大,所以每條街都係南北走向,相當齊整

交通

1. 因爲地大,所以要有妥善公共交通配套,呢方面北平起碼夠平,公交短綫一蚊長綫兩個半,地鐵兩蚊任搭
2. 路面情況不敢恭維,雖然已經少有隨意切線沖燈,但近市中心就塞到不得了,"首堵"果然名不虛傳
3. 大陸果然係行有罪假定,機場搜出境旅客身,同搜犯人身幾乎冇分別,不過可唔可以做好航空管制先,塞車塞到上跑道

名勝

1. 天壇算係保存得好好,地方寬廣而自有靈性,圜丘更有古代術數之美
2. 天安門廣場,有兵駐守同巡邏...作爲國家敢殺不敢認嘅無恥象徵,可以理解,仲要咁啱俾我哋見到有兩個呀婆衝向國旗,但未到就被公安帶走咗......今次真係想洗腦都洗唔到咁多人
3. 故宮唔知係咪復修budget唔夠,顯得有啲"金玉其外,敗絮其中",天安門、太和殿呢啲整到金壁輝煌,去到乾清宮已經好舊,再入到儲秀宮,直頭好似冇維修過咁
4. 八達嶺長城,冇咗好漢牌匾,做唔到好漢...但就算天氣苦寒,兼天未光就出發,依然值得一遊,起碼可以feel到當年防範遊牧民族係幾咁辛苦,亦明白多幾分袁崇煥金句嘅真義
5. 明長陵可去可不去,但起碼比起故宮,更易了解古代大殿内部嘅空間感覺---因爲有得入
6. 頤和園真係靚,靚到你會省起,北洋艦隊其實喺呢度已經沉咗,因爲啲budget用咗喺呢度嘅美景,唔係買新戰艦新艦炮
7. 圓明園已經爛晒,結果幾乎變成普通一個公園,而僅存嘅一堆瓦礫只能成爲仇外而非建設嘅象徵...不過真正明白嘅人,應知道圓明園遺跡反映盛衰嘅循環,由部分師法西方到厭棄西方,最後被西方列強狠狠教訓,不過百餘年...


1. 炸醬麵,唔係俾香港人食嘅,強烈反推介
2. 冰糖葫蘆同其它冰糖生果,將生果嘅鮮味好好保存,相當好食
3. 羊係最主要食品來源之一,北平人食羊,同香港人食牛一樣,幾乎所有部份都食得,而且羊奶遠比牛奶多...總括嚟講,你可以食到自己成身羊味,連狗都以爲你係食草大嘅
4. 烤鴨當然係北平好食,但似乎總係最後先上,所以如果大家下次去食,記得唔好嗌咁多其他餸
5. 東來順(北平)vs.小肥羊(北平)---口味各有千秋,但無論價錢,份量,服務,裝修,都係小肥羊勝一籌!