反國教鬥爭之我見

今次反國教鬥爭，我唔係幾樂觀，因為我哋用嚟show hand嘅賭注太少，政府無壓力。

王岸然曾經講大家要候選議員表明，不撤回就罷免特首，結果大家都反應不大。呢招連埋人力話不撤回就無限期拉布，已經係反對派政客最易打、最大威力嘅牌，結果參與嘅政客真係少之又少，連宣傳都無乜提…

再講到民間，我唔認為香港人真係有任何升級鬥爭嘅心理準備－因為佔香港大多數嘅大陸人，其實唔認為香港有乜唔好，佢哋經過大躍進同文革，早就無任何志向，除非香港出現飢荒，否則動員佢哋嘅可能性接近零，唔反動員你，要你哋留喺屋企唔准出街已經偷笑。佢哋教出嚟嘅仔女亦必然有貪生怕死、只求着數不求有道嘅殘餘，要費九牛二虎之力先暫時擺脫一陣。更唔駛提啲中產成副身家喺層樓度，要死做爛做仲要驚香港亂就樓價大跌…

不過，如果大家真係放手一博，非逼到國教科徹底收皮不可，仲有一招絕招可以用，就係老笠，吖唔係，係挾天子以令諸侯。搞政治，最少係而家嘅醜惡政治，唔惡毒啲唔得架。

香港嘅人質…吖唔係，我想講共主、天子，唔係喺門常大俾人圍緊嘅政苦，更唔係中共，而係四個字：繁榮穩定。呢樣唔單止係民心所向咁簡單，而且係維持香港經濟命脈嘅必要因素。所以大家要成功，就要將繁榮穩定變成大家嘅人質，吖唔係，係漢獻帝---要政府明白，為咗香港嘅繁榮穩定，國教必須撤回，如果唔係，我哋就會……

我鼓勵大家暴動？錯覺嚟姐，駛乜暴動呀。全香港都有馬路，尤其幾條隧道，大家要坐喺度，等佢喺繁忙時間塞幾個鐘，或者喺開市日晨早圍住成個港交所，組成人鏈封鎖全部出入口，話唔定幾個鐘之後，班富豪已經爭住俾贖金，call爆特醜條線，叫佢即刻撤回添啦，駛用暴力咩？罷課反而無乜用，因為啲政府高官，大富豪嘅仔女都喺國際學校同外國讀書，真正你死你賤。