吳起隨想

喺小弟同朋友一齊搞嘅"無聊聊聊"論壇仔入面，有網友(姑且稱爲網友D)提到，中國國勢強盛，反共只會令外國勢力入侵，而且中共倒臺中國就會出現權力真空，分裂割據咁話。於是我就諗，究竟乜嘢情況下，中共會打仗？中共嘅權力基礎係咪咁穩固？然後，就聯想起吳起呢位戰國兵家。

我最近鍾意睇陳雲老師嘅書同文章，佢經常強調自己係儒門正宗，又話要用現實政治(real politik)去令香港得以城邦自治。咁啱我對先秦兵法同西方戰略思想有些少認識，於是就諗，其實兵法又可唔可以同樣令我哋對現實政治同行動方面，有更好嘅認識呢？在我嚟睇，吳起嘅生平同著作《吳子》應該多多少少幫到手。

以下不妨由網友D嘅意見入手，睇下吳子會點講。

所謂外國勢力入侵，現代已經有好多種形式，由直接出兵攻打，到間諜戰、網絡戰，到經濟侵略同所謂文化侵略都有。不過，由網友D嘅意思嚟睇，佢顯然係指最古老、最明顯嘅入侵方式---打仗。打仗就係古人所講嘅用兵，以下睇睇吳起係點分析：

吳子曰：“凡兵之所起者有五：一曰爭名，二曰爭利，三曰積惡，四曰內亂，五曰因饑。其名又有五：一曰義兵，二曰強兵，三曰剛兵，四曰暴兵，五曰逆兵。禁暴救亂曰義，恃眾以伐曰強，因怒興師曰剛，棄禮貪利曰暴，國亂人疲舉事動眾曰逆。五者之數各有其道：義必以禮服，強必以謙服，剛必以辭服，暴必以詐服，逆必以權服。”（《吳子》圖國第一）

簡單嚟講，吳起認爲，之所以會有戰爭，係有五個原因，同時有五種相應嘅平息方法(服)：

爭名-禁暴救亂-義兵-以禮服
爭利-恃眾以伐-強兵-以謙服
積惡-因怒興師-剛兵-以辭服
內亂-棄禮貪利-暴兵-以詐服
因饑-國亂人疲舉事動眾-逆兵-以權服

呢個小弟姑且稱之爲"五兵論"嘅戰爭起因及平息方法配對，言簡意駭，相信大家就咁睇都會明白。"五兵論"同中共有乜關係？好簡單，只要中共變得強大或者衰弱，就會有機會出現呢幾種戰爭：

爭名：以中共邊界之廣大，同其他國家領土爭議之多，加上中共當政非以仁義、人道治國，只要中共變得強大，冇其他國家可以制衡，中共自然就會出手解決領土爭端、或者以武力"統一"台灣；或者中共變得衰弱，無力阻止入侵，咁各國就會以禁暴救亂嘅名義出兵攻打。

爭利：領土爭端除咗所謂"神聖不可侵犯"，好多時更有利益關係，例如釣魚臺就有東海油氣田開發嘅考慮。爲此美日磨刀霍霍，自然不過。

積惡：中共對鄰國嘅外交政策，頗有以鄰爲壑嘅意味，例如開發湄公河上遊水力發電，就會令下遊緬甸、越南等國生態受損，更唔需要提雙非嬰對香港及北美地區孕婦利益嘅損害；對國內少數民族嘅政策，好多時相當霸道，大家都明白西藏同新疆喺中共治下，實行漢化政策對藏民及維吾爾人係幾殘暴。咁嘅情況下，只要中共有明顯崩潰嘅跡象，鄰國會因積怨興兵，機會頗高。

内亂：呢點可以稍加解釋。吳起認爲内亂即係"棄禮貪利"，當中"禮"嘅意思相當空泛，但大致嚟講，係講國内與國際間嘅秩序同規矩。所以佢嘅意思，用現代語言講，即係當國內外嘅秩序同權力均衡崩潰，當政者就會爲舒緩國內壓力而出兵，順便混水摸魚拎着數，近代史上拿破侖同希特拉就係呢類乘勢而起嘅獨裁者。既然我都講到拿破侖同希特拉，咁將來中共現有秩序崩潰，出現陳雲老師所講"中國急促民主之後，很有可能滑入法西斯軍國主義，由「中共法西斯」變成「中國法西斯」"(香港城邦論P.052)，大家就明白點解會打大仗喇。

因饑：當中共治下秩序全面瓦解，去到連基本糧食、自然資源都冇辧法滿足大陸人需要，就會出現而家非洲多個國家瓦解之後嘅連年内戰同對外劫掠。

既然以吳起嘅理論同中共嘅業績嚟睇，將來中共不論繼續崛起直至變成霸權，抑或由盛轉衰，都好大機會出現戰爭，咁跟住落嚟，就要睇下中共會係好似網友D咁講"自鴉片戰爭以來,中國國勢未有今日之強盛者"，還是只係沙上嘅樓閣，權力基礎不穩呢？

吳起認爲，國家要強盛，要戰勝攻取，最重要係君民和，親賢能遠不肖等。以佢自己嘅説話講，就係以下兩段，皆出自《吳子》圖國第一:

"昔之圖國家者，必先教百姓而親萬民。有四不和：不和於國，不可以出軍；不和於軍，不可以出陳；不和於陳，不可以進戰；不和於戰，不可以決勝。是以有道之主，將用其民，必先和而造大事。...民知君之愛其命，惜其死，若此之至，而與之臨難，則士以進死為榮，退生為辱矣。"

"君能使賢者居上，不肖者處下，則陳已定矣；民安其田宅，親其有司，則守已固矣；百姓皆是吾君而非鄰國，則戰已勝矣。"

當今之勢，中共正正就係倒行逆施，同吳起呢兩段教訓背道而馳。中共對人民生計、人權嘅關注不周，甚至幹部殘民自肥亦不嚴加懲處(不爲？不能？)，自然變成"不和於國"。所謂和諧，點會係靠把口或者靠網絡長城咁簡單？以中共而家嘅治國之道，點可能做到"士以進死為榮，退生為辱"？

中共縱容地方幹部殘民，地任圈樓任拆，而且升遷惟GDP是尚，點可以做到"使賢者居上，不肖者處下"，"民安其田宅，親其有司"，人民又點會真心"是吾君而非鄰國"呢？

因此，如果吳起今日復活，親眼目睹中共嘅弊政，睇怕只會用"成湯討桀而夏民喜悅，周武伐紂而殷人不非"（《吳子》圖國第一）嚟形容將來會大舉進攻中共嘅國家，而中共呢，自然會好似夏桀同商紂一樣敗亡，過程幾近兵不血刃。

最後，引用吳起對魏武侯嘅勸戒，結束本文。(見《史記卷六十五 孫子吳起列傳》)

"魏文侯既卒，起事其子武侯。武侯浮西河而下，中流，顧而謂吳起曰：「美哉乎山河之固，此魏國之寶也！」起對曰：「在德不在險。昔三苗氏左洞庭，右彭蠡，德義不修，禹滅之。夏桀之居，左河濟，右泰華，伊闕在其南，羊腸在其北，修政不仁，湯放之。殷紂之國，左孟門，右太行，常山在其北，大河經其南，修政不德，武王殺之。由此觀之，在德不在險。若君不修德，舟中之人盡為敵國也。」武侯曰：「善。」"

如果中共由中央至地方所有幹部都明白"在德不在險"，"若君不修德，舟中之人盡為敵國也"嘅道理，則事或尚有可爲；否則，恐怕終不免三苗、夏桀、殷紂嘅命運。