吳起隨想．二

我個人嚟講，係幾欣賞吳起寫嘅兵法《吳子》，但如果講起吳起嘅人品，就只能話係不敢恭維。喺《史記》作者司馬遷筆下，佢係講一套做一套、爲求目的不擇手段嘅典型反面人物。

佢喺離開家鄉衛國，啱啱出道嘅時候，就已經做出能人所不能嘅惡行嚟博上位。“事魯君。齊人攻魯，魯欲將吳起，吳起取齊女為妻，而魯疑之。吳起於是欲就名，遂殺其妻，以明不與齊也。魯卒以為將。將而攻齊，大破之。 ”雖然古代亦有好似劉備咁，聲稱“兄弟如手足，妻子如衣服”嘅男人，但係去到殺妻以取信魯君，實在係非一般人所能想像嘅殘忍。難怪之後就出現對吳起不利嘅流言，令佢被魯君再次起疑---其實當中一啲内容，例如爲功名而不服母喪，甚至殺死恥笑佢嘅同鄉之類，以佢後來嘅作風嚟講，可能並非虛構。不過，更加重要嘅原因，相信係因爲魯國係古國，自有其源自西周初期嘅禮法及政治秩序，最忌憚吳起呢個野心勃勃嘅外國人。所以即使齊魯之間繼續有戰事，啱啱收拾“三桓”正式掌權嘅魯穆公都唔敢再留吳起。

好啦，東家唔打打西家，吳起喺戰國初年嘅亂世，仲有好多選擇。結果，佢去咗當時啱啱“三家分晉”而出現嘅魏國。

當時，吳起殺妻拜將嘅事跡可能已經非常有名，所以魏文候問相國李悝嘅時候，李悝都話吳起“起貪而好色，然用兵司馬穰苴不能過也。”當中嘅貪，可能係貪功、貪名，但無論如何，都肯定係殺妻拜將一事所得出嘅評價---唔只貪功名，仲要不擇手段，但魏國當時並無類似魯國一樣嘅禮法同政治秩序可以鞏固國本，所以必須靠各地人材爲魏國效力，吳起卒之獲得重用，得到不少偉大嘅戰績，獲封河西太守，呢個可算係佢最風光嘅時候。

但係好景不常，魏文候死後輪到個仔魏武候做國君，吳起嘅權勢就開始衰落。雖然吳起曾經講出“在德不在險”嘅著明勸諫，但係顯然佢唔知道，德，唔單止講道德，而且講人和---“人和”呢個詞語，係稍後嘅孟子講嘅，但吳起學儒家嘅輩份比孟子更高，照計冇理由未聽過孔子嘅名句“夫仁者，己欲立而立人，己欲達而達人”《論語·雍也 》如果佢真係明白而且身體力行，就唔會有以下嘅事件出現：

魏武候搵新相國，結果唔搵大熱門吳起，反而爆大冷搵咗田文，於是吳起唔忿氣，就搵田文出嚟，不斷講自己有幾威水有幾犀利，田文拍馬都追唔上；但係田文只係講咗一句就另吳起冇聲出：“主少國疑，大臣未附，百姓不信，方是之時，屬之於子乎？屬之於我乎？ ”顯然，吳起冇辧法穩固國家，令國君安心，大臣放心，百姓有信心，反而會令魏國崩潰。以吳起嘅政治同軍事才能，唯一會令佢爲魏國帶來災難嘅原因，只可能係佢爲求目的不擇手段嘅作風，足以令所有人疑心。結果，吳起冇幾耐之後就因爲一啲政治問題而被逼出走楚國。

去到楚國，吳起得到楚悼王賞識，破格委任做“令尹”呢個一人之下萬人之上嘅職位。有幾破格？令尹係楚國百官之首，歷來只會由楚王親族擔任，只有吳起同埋二百幾三百年前嘅彭仲爽係外國人。楚國幾百年來都未試過有外國人做令尹，可想而知楚悼王係幾咁仰慕吳起。

可惜楚悼王嘅賞識，最終反而爲吳起帶來殺身之禍。因爲楚國幾乎同魯國一樣古老，而且同衛國、魯國甚至魏國唔同，楚國並非周代嘅封國遺留，而係南面嘅楚文化獨立發展而來；更重要係楚國嘅貴族勢力非常強大，而吳起嘅政治理念同法家李悝比較接近，所以一到楚國就搞法治、削弱貴族嘅措施，“明法審令，捐不急之官，廢公族疏遠者 ”結果當然成爲楚國貴族嘅仇人。楚悼王一死，吳起就冇咗最後嘅靠山，被楚國貴族射殺。楚國貴族對佢嘅怨恨之深，可見於佢哋寧願誤中楚悼王屍首因而被夷族，都唔肯放過吳起，可見一班。

卒之，講完吳起嘅故事。如果我係電視節目主持人，可能會話吳起雖然有聰明才智，但係作風不擇手段，口講仁義而實際上“刻暴少恩 ”，我哋應引以爲鑑......

不過，我並唔係主持，無需講呢啲行貨嘢。我真正想講嘅係，專橫霸道、爲達目的不擇手段嘅作風，喺某啲時候其實並非壞事。關鍵係，喺古代、亦僅限於只有專制政治一種體制嘅中國古代，如果當事人係喺危急存亡之秋，爲一己以外嘅偉業行事，咁可能尚可接受；否則就係不可原諒。喺咁嘅角度，吳起嘅行爲道理有虧，但最少一直盡全力，爲佢所侍奉嘅國家打勝仗、改革弊政。戰國以後，可以同吳起一樣，並非皇帝但可以用強硬或者霸道嘅手段去進行改革嘅人實在好少，反而弄權、把持朝政而令嘅在所多有。少數可堪比較嘅包括張居正，佢嘅目標同樣遠大，希望改造明朝，下場亦唔好得過吳起幾多，雖然權傾朝野甚至自稱攝政，但死後下場非常可悲，全家皆受牽連，阿媽同幾個仔或死或充軍，原因同吳起被殺一樣，就係樹敵太多，加上唯一靠山死咗或者轉軚---呢個唯一靠山，就係楚王同皇帝。但掉轉嚟講，喺楚國、明朝呢啲制度又舊又霉、貴族或官僚山頭林立嘅國家，唔係咁霸道甚至偏激嘅人，點會肯走出嚟做得罪99%大人物嘅變法派？

正因如此，我認爲現代民主制度可貴之處，就係改革者可以有更好嘅方式去進行改革事業，而且只要唔犯法，依然可以全身而退。現代民主制度嘅彈性同修服能力，就係由此而來：無論改革者係乜出身，只要法案係可以喺議會提出，就無需驚法案被否決之後會被報復，因而失去生命財產嘅安全同自由。而且除咗少數不世出嘅天才，否則多數情況下，改革者亦不過普通人，因此喺議會同政黨集眾智立法，效果實勝於一言堂嘅霸道作風。最後，好多改革措施都係需要長時間先可以見效，而透過現代民主制度喺議會立法，就可以確保法案將會持續執行，唔會受皇帝嘅生命長短、或者係佢嘅政治立場變更而中斷。當然如果立法後發現有問題，亦可以喺議會用投票方式修訂或廢除，而且過程不見血，對所有改革者都有起碼嘅保障。

正因如此，吳起、張居正之類嘅霸道改革者，同埋佢哋嘅悲慘結局，只會喺專制政治出現。現代民主制度可以令其他改革者以更文明、更安全、更持久嘅方式---議會制度，去推行改革，對我嚟講，實在係人類各種偉大成就嘅基石。