中女詩中總是情

不才新識嘅飛卜朋友白蓮達姐姐，最近出咗本詩集，叫做<<中女情懷總是詩>>，入面有佢多年來嘅作品，總共41首詩同2篇散文。今日白姐姐喺佐敦麥記搞詩歌分享會加生日會，不才有幸可以參加，而且得到白姐姐親筆簽名詩集一本，終於可以欣賞佢嘅文學才華。

白姐姐自稱中女，不才好同意架，不過呢個中唔係形容年紀，而係解“秀外慧中”。秀外就無需多講，由佢清麗脫俗嘅外表就見得到。至於慧中，就要睇睇佢嘅詩究竟寫啲乜喇。

白姐姐最出名嘅一首詩，係今年年頭嘅“反D&G霸權”，大家都知道呢間廣東道名店係幾咁囂張，竟然唔俾香港人影相，最後被幾千人不斷圍住嚟影。呢首詩最後幾句係咁嘅：

或許你記不起

何時開始駐足本地

然而你應告訴我們

何時打算撤離

呢幾句，真係講出當日大家反對D&G嘅心聲，呢間公司侵犯公眾權利、賺大陸人錢之餘藐視香港人，最後終於喺群情洶湧下讓步。

當然，白姐姐嘅詩唔係淨係義憤填膺，更加多係對香港、對人生、以至對各種事物嘅感慨，而且由呢啲詩入面，可以見到佢豐富但內歛嘅感情，敏銳嘅觀察力同好奇心。例如“珠頸斑鳩”一首詩，甚至可以見到白姐姐想同雀仔玩、但雀仔唔理佢嘅滑稽場面：

過客如我

模仿你的叫聲

而你

竟無暇看我

而不才感受最深嘅一首詩，係白姐姐紀念亡父嘅“再來的時候”。幾乎人人都有阿爸湊大，所以下面嘅場面應該唔陌生：

曾經，你和母親吵架

帶我離家，你不曉得應往哪裡去

然後

我們看電影

我們吃大排檔

很晚很晚

我們才回家

不才都記得有幾次，阿爸同阿媽嗌交之後，同阿爸、細妹三個一齊去茶餐廳食嘢，所以好有共鳴。而對白姐姐嚟講，亡父最後帶俾佢嘅嘢，可能係對無可奈何嘅死亡當中一絲安慰：

你生活過得富足麼？我們無法知道，然而

從你堅定的目光

我們相信

你已在外面的世界展開新生活

相信有堅強嘅阿爸，面對喪父之痛嘅時候，都可以容易接受少少...不才雙親健在，實在未知到時可唔可以咁放心。“再來的時候”寥寥數句，已經將亡父平凡但堅強嘅形象寫得入木三分，希望大家可以一讀再讀。

有人稱呼白姐姐係香港城邦詩人，讚佢以詩歌紀錄香港、抒發香港人對政治社會嘅不滿。呢點不才亦同意，但不才更加珍視白姐姐嘅豐富情感，喜愛白姐姐嘅真摯筆觸。