2012年11月21日 星期三

[潮文]某台其實係寵物,兼論奴才之高下

功利小家又無知嘅香港人,經常以為某個電視台係一盤生意,所以推而廣之,認為佢嘅收視咁低,應該執咗佢,收返個牌俾其他人搞...
! 錯晒! 一間蝕足廿幾年,日日推架法拉利落海嘅公司,點可能係一盤生意? 咁嘅生意,點可能唔破產之餘,仲有幾個老闆接住買?
不才以為,由一隻寵物,或者一件富貴玩具嘅角度睇比較合符事實。好簡單一個道理,唔計狗房,寵物店,車廠之類,呢個世界養寵物,儲法拉利同林寶嘅人,有幾多係為賺錢? 只怕萬中無一。相反,我哋只會見到狗主同車主用一大筆錢買返嚟,再用好多大筆錢去養狗養車,經濟效益係絕對負數,但對佢哋嚟講,又有乜所謂,自己開心就得啦。
呢間一日幾次零收視,節目重播幾十次嘅電視台亦一樣,而家只係某政權為咗自己開心自己爽,揾某富商代養嘅超富貴寵物,或者係一堆寵物,同以前MJ個動物園一樣。而特衰政府當然唔夠膽做任何危害呢隻寵物嘅事,俾着你,就算老闆隻狗點樣鍾意亂吠,都唔敢毒死佢;如果老闆就係鍾意隻狗狂吠,你又等錢駛,可能仲要讚隻狗好中氣,主動提出幫手放狗,擦狗毛順便擦老闆鞋。
當然,你真係頂唔順隻衰狗嘅可以釜底抽薪,介紹老闆養其他狗,等老闆覺得呢隻狗其實無其他狗咁好玩,令呢隻惡頂狗失寵。失寵嘅寵物下場永遠都淒慘,睇住隻衰狗嘅慘樣,你條氣當堂順返晒,仲可以藉呢啲功績得到賞賜及加分。九流嘅奴才淨係識忍,三流嘅奴才淨係識讚,一流嘅奴才呢?要識得俾老闆更好嘅選擇,而令老闆貪新厭舊。連呢個道理都唔識,喺處理電視牌照時只會粒聲唔出,就證明處理發牌嘅官員以及特衰政府根本只係九流嘅奴才,難怪乜都做唔成。