2013年12月31日 星期二

論希臘羅馬公民身份(下)

論希臘羅馬公民身份()



上篇講羅馬開放公民身份,積極吸納移民、戰敗國人民及解放奴隸加入公民行列,終於變成西方最偉大嘅帝國,接近擴張嘅極限。爲咗消除內戰,同時令帝國得以正常運作同發展,羅馬帝國嘅公民身份經過兩次重大嘅轉變。


奧古斯都:制度性吸納公民新血,促進帝國繁榮昌盛

帝政初期,意大利半島已經變成羅馬帝國嘅本國,所有原來其他城市嘅公民都變成羅馬公民。於是公民身份如果要繼續開放,就要轉爲向廣大嘅行省人民開放。但如果向全部行省人民開放,唔單止引起原來嘅公民不滿,而且亦會超出當時制度嘅容納能力,最後天下大亂。

深思熟慮之下,奧古斯都將吸納羅馬公民嘅方式制度化。其中一部分政策係由佢養父凱撒生前所制定,就係做醫生同教師可以成爲羅馬公民,不過唔可以世襲。此外,以前亦已經有贈予地方豪族公民權、或者俾有錢人買公民權嘅習慣。更大規模嘅吸納公民措施,同奧古斯都嘅軍事改革有關。

奧古斯都爲咗兵息戰,決定將五十萬大軍大幅削減至十七萬人。但係,呢十七萬人,通稱軍團兵,並唔係羅馬嘅全部兵力。奧古斯都改革兵制之後,每個軍團除咗軍團兵,仲有數目相當嘅輔助兵。軍團兵只限羅馬公民應募,而輔助兵就專爲行省人民而設,而且軍團兵嘅裝備較佳,薪餉較高,服役年期更短,退休金亦更多...即使係咁,輔助兵依然吸引大量行省人民應募,因爲輔助兵退役之後,可以獲得羅馬公民身份,而且可以世襲。

當時嘅羅馬公民比起行省人民,實在有唔少優待,因此能夠吸引行省人民應募輔助兵。例如司法,羅馬公民唔怕受行省總督或者官吏欺壓,因爲有個喺羅馬嘅法院做上訴庭,咁就唔怕俾地方法官屈打成招;想做中央或地方官,更加係非羅馬公民不可參選或投票;最現兜兜嘅着數就係稅制,除咗人人都要俾嘅消費税(税率1%),行省人民每年都要俾10%嘅行省税,而羅馬公民就唔駛俾行省税,只係要俾一筆過、税率5%嘅遺產税同解放奴隸税,而且前者只要係六等親以內繼承就免税,後者其實係奴隸嘅贖身費,主人通常只係暫時代繳......

於是,羅馬公民唔單止有地位,而且有現兜兜嘅着數,足以吸引大量行省民當兵、做教師及醫生;而吸納呢啲以職業貢獻帝國嘅行省民做羅馬公民,亦對帝國嘅防衛同發展有利。於是百多二百年後,羅馬帝國嘅精英階層,包括皇帝在內,就多咗好多以前係行省民、但努力咗幾代嚟貢獻帝國嘅家族。真係好有獅子山下精神...吖唔係,係羅馬精神先啱。事實上,而家唔少國家嘅投資移民同工作移民,喺精神上同羅馬帝國吸納公民嘅措施一樣,可以話,呢個係羅馬重要遺產之一。


卡拉卡拉:行省民自動變成羅馬公民,卒至帝國衰落

奧古斯都改革,奠定羅馬帝國發展強盛嘅基礎。兩百幾年後,一個唔多出名嘅羅馬皇帝卡拉卡拉,頒布咗一個“安東尼奧勒令”,結果摧毀咗呢個基礎。勒令嘅內容好簡單,就係將所有未曾取得羅馬公民身份嘅行省人民,升級做羅馬公民。

公平,真係好公平;大鑊,真係好大鑊。

公平,大家好易理解,因爲所有行省人民---直到呢個時代,依然佔帝國境內大多數---自此變成羅馬公民,享有同等嘅司法權利、政治權利、仲有低稅率。但係大鑊呢一點,如果你唔係羅馬皇帝或者執政官、總督、元老院議員等等嘅國家棟樑,又冇一千八百年後嘅馬後炮觀點,當時嘅人未必咁容易睇得出。

首先,我哋睇返上面,奧古斯都改革之初,點解唔將整個帝國嘅人都變成羅馬公民。就係怕當時原來嘅公民反感,與及要令制度可以容易處理,避免天下大亂。卡拉卡拉嘅勒令,正正就係導致奧古斯都最想避免嘅情況出現。

原有公民嘅反感並未大到排擠新香港人...吖應該係新羅馬公民,但係佢哋當中大多數都係親自或者有先祖嘅努力同貢獻,先至可以成爲公民;但而家嘅新公民,喺佢哋眼中,根本乜都冇做過就有公民身份。而新公民就認爲,好命好過好波,駛乜做輔助兵喺雪山、森林、沙漠同蠻族死過吖,而家皇帝開句聲就令大家都可以拎到着數,哈哈哈,咁搏咁勤力,把鬼咩。結果,就係爲國盡忠、貢獻社會嘅羅馬精神,變得蕩然無存。

失去奮發向上嘅精神,任何制度都好難有效運作,何況呢條勒令嘅後果,會直接沖擊當時嘅各種制度。例如司法制度,本來羅馬嘅“終審法院”只爲佔少數嘅羅馬公民而設,但而家人數一次多咗幾倍,案件數量亦成比例咁增加幾倍,但法官同律師冇辦法同時增加,咁你話,點算?結果就係,終審法院接近癱瘓,十五年後另一個皇帝被逼立法,將終審權交俾行省總督。以前最少有部分人可以上訴,而家個個都冇得上訴,真係好公平。

又例如財政。呢樣就真係小學生都識計,一生人交一次5%嘅遺產稅(仲要六等親以內免税)、解放奴隸税,同每年10%嘅行省民税比,邊樣嘅稅收多啲?咁你話,咁搞法帝國財政一下子少咗咁多收入,點算?嗰陣又未有債券,何況債券都要有足夠稅收擔保先有人敢買,唯有每次政府要錢嘅時候就加新税,加下加下稅率就高到不得了,同時税項多到記唔住。羅馬本來嘅簡單低税率稅制,就變成複雜高稅率稅制,而全體羅馬公民,不分新舊都要硬食,真係好公平。

更大鑊嘅係軍事。輔助兵之所以可以忍受低薪同更長嘅服役年期,完全因爲退休之後可以得到羅馬公民身份。而家忽然間人人都係羅馬公民,咁輔助兵自然會要求同軍團兵同工同酬,雖然會大大加重財赤,但係咁先公平㗎嘛。

不過,喺羅馬嘅軍隊入面,公平係會好大鑊。首先,輔助兵最大嘅吸引力在於退役後嘅公民身份,而家忽然冇咗呢重吸引力,就令行省嘅“新羅馬公民”再冇動力當兵,做成徵兵困難,即使後來同工同酬都冇辦法湊足新兵。其次,以前輔助兵表現得好,可以升格做軍團兵,甚至做百夫長同軍官,而家冇咗升做軍團兵呢部分,就令佢哋當中嘅大多數都唔再願意爭取表現,而原有嘅軍團兵亦因缺少競爭而變得怠惰。

呢個公平咗但又懶咗嘅軍隊環境,加上日漸加劇嘅財政赤字、時有時冇嘅軍餉,與及全體新舊公民突然失去奮發向上嘅動力,結果就係後世所謂嘅三世紀危機:蠻族屢次擊敗羅馬軍,喺帝國境內燒殺掠奪;將領擁兵自重,各據一方,內戰打個不停;行政癱瘓,法律廢弛,各級政府無法運作。最後羅馬帝國實在太亂,於是戴克里先爲咗重整帝國,決定將帝國嘅根本,由法治改爲高壓極權,羅馬帝國於是變質、最後瓦解。當然,喺帝國末年,幾乎人人都要交重税,俾蠻族搶過幾次家當,最後成個西羅馬帝國滅亡,齊齊做亡國奴,一樣係好公平。


國家的公民如何,國家的日子也必如何

由希臘羅馬文明嘅公民身份變遷可見,公民身份有幾開放、點樣開放,都會影響國家嘅發展。因此後世對於公民權利義務點樣界定,點樣吸納移民,都視爲重要嘅國策。太狹隘會妨礙發展,太開放會敗壞國政,人人冇權同人人都有好多權,同樣會危害國家生命。國家的公民如何,國家的日子也必如何。

論希臘羅馬公民身份(中)

論希臘羅馬公民身份()



上篇講完希臘城邦嘅公民身份,呢篇開始輪到講羅馬嘅公民身份。羅馬人嘅公民身份同希臘人唔同,於是國家嘅發展方向亦唔同。


羅馬王政及共和:公民身份成爲擴張工具

羅馬建城之初,出現以下嘅故事:

羅慕路斯佔七山爲王,建立羅馬城。但係當時嘅羅馬人多數都係第二度嚟嘅逃犯、奴隸、貧民,幾乎個個都冇老婆,於是佢哋宴請附近嘅薩賓人,然後老笠咗幾百個女人。薩賓人當然唔肯罷休,出兵攻打羅馬,就喺雙方死傷眾多之際,薩賓女人帶埋仔女一齊衝出嚟,擋住雙方唔俾佢哋打仗。原來佢哋已經同羅馬人結婚生仔,唔想老公同自己外家打仗,希望佢哋講和。結果羅馬人同薩賓人講和,而且薩賓人全體搬入羅馬城居住,享有同羅馬人一樣嘅權利,羅慕路斯同薩賓人國王共同爲王。

呢個薩賓婦女嘅故事,反映出羅馬人同希臘人喺公民身份方面有唔同嘅概念。希臘人認爲,公民權係睇血緣,完全唔接納外國人同奴隸做公民;但係羅馬人最少願意定一個條件,嚟吸納其他地方嘅人做公民。而羅馬建城之後經歷七個國王,當中大部分時間都係進行“征服鄰近城市=>吸納戰敗城市人民做羅馬公民”嘅擴張工作,同時亦以開放嘅羅馬公民身份嚟吸引其他地方嘅人移民。

後來羅馬城驅逐國王建立共和,依然繼續進行征戰。因爲羅馬城已經好多人,加上周圍容易征服嘅城市都已經被吸收,所以佢哋冇再將戰敗城市嘅人全部吸納。但係,佢哋建立羅馬聯盟將鄰近嘅城市接收,令佢哋成爲永久性嘅同盟或者附庸,同時賦予選舉權同被選舉權以外同羅馬公民權同等嘅拉丁同盟權,佢哋如果肯搬入羅馬,更加可以移民成爲羅馬公民;同時,古代有戰爭就會有人被俘虜淪爲奴隸,但係羅馬人鼓勵奴隸儲錢贖身成爲解放奴隸,佢哋嘅仔女就可以獲得羅馬公民身份。

到後來羅馬聯盟嘅範圍擴大到整個意大利半島,羅馬聯盟嘅其他城市公民,希望能夠獲得羅馬公民權,但羅馬拒絕,於是佢哋決定出兵攻打羅馬,結果羅馬雖然打敗呢啲城市,但由於呢個係利用羅馬公民權嚟分化造反城市嘅結果,所以呢啲城市嘅公民終於得償所願,全部成爲羅馬公民。


開放公民身分,做就帝國但摧毀共和

開放公民身份嘅好處,同上篇講嘅完全封閉希臘公民身份相比,實在顯而易見。羅馬公民嘅人數,因爲積極吸納其他城市嘅公民而不斷增加,由幾千人增加至幾十萬人,因此兵力亦比任何希臘城邦都多。雅典喺西西里損失三萬人,就足以導致衰落,但係羅馬喺第二次布匿克戰爭俾漢尼拔大敗三次,其中坎尼會戰有近七萬人戰死,但係依然能夠不斷徵兵再戰,唔單只鄰近城市願意提供兵力,連奴隸都可以即刻解放組成軍團,卒之轉危爲安,將大敵迦太基打敗,成爲地中海霸主。

不過開放嘅公民身份亦做成危機,最終摧毀共和。喺我之前嘅文章(http://www.vjmedia.com.hk/articles/2013/10/11/51464)就提過,羅馬嘅投票制度係一種要經過公民討論再投票嘅直接民主制度,而直接民主制度有一個特點,就係人多就會癱瘓同腐化。因爲人多就好難透過商議同辯論,令所有與會者可以思考各方立場再投票---聽又聽唔到,講又冇機會講,甚至場都入唔到,呢啲討論會點參與呀?呢點各位如果有參加反國教集會,而又入唔到政總大門嘅,一定即刻明白。結果就係,賄選造票取代商議辯論,內戰又進一步取代公民大會主宰國政,最終摧毀羅馬共和。

而當羅馬共和名存實亡,即係屋大維獲封爲第一公民及奧古斯都兩大頭銜之日,羅馬已經變成本國範圍覆蓋整個意大利、行省遍布整個地中海及西歐,西方史上最偉大嘅帝國,咁亦導致羅馬公民身份出現變化。

論希臘羅馬公民身份(上)

輔仁投稿版在此。爲怕有人too long don't read,於是網誌以原來分成三篇嘅方式刊登。
http://www.vjmedia.com.hk/articles/2013/12/31/58942

論希臘羅馬公民身份()




身份,從來都係人類活動嘅基礎,所有家庭、機構、以至社會,都有將人劃分爲唔同身份嘅習慣。而且呢個分類係立體嘅,既有水平嘅內外之分,亦有垂直嘅上下之分。可以話,呢樣係源於某種生物遺傳,自然會出現嘅人類本能。

當我哋將人類嘅組織規模擴大,直到國家嘅層面,就會發現,有一種身份特別重要,可以話係現代國家嘅基礎:公民。公民,現代嚟講泛指一國之中有權參與國政嘅人,附帶有各種權利同義務。而呢個概念完全由西方而來,所以直到今日,香港呢個中國殖民地依然好多人完全唔明何謂公民,或者一知半解。

就算喺西方,公民嘅概念都經過唔少轉變。以下就簡介希臘同羅馬嘅公民身份概念,順便以馬後炮角度講解一下當年嘅概念帶嚟乜嘢後果。至於借古鑑今?well,冇話唔得嘅,但係咁,如果想做真正公民,麻煩先幫香港解殖,因爲殖民地蟻民喺政治上根本冇權話事,冇得參與話事過程就唔係公民,完。


希臘城邦時期:極爲封閉的公民身份

有人認爲,希臘城邦係現代西方政體嘅根源,實際上唔可以好簡單咁講,西方國家嘅政治制度源於二千幾年前希臘城邦嘅某某制度,好多時最多只係個名似,內容已經好唔同。起碼,現代西方國家界定公民嘅方式,已經同希臘城邦時代差好遠。

希臘城邦嘅公民身份可謂非常封閉,取得方式只有一個:父母都係該城邦嘅人,所生嘅成年男性。係呀,就係咁簡單,因爲希臘城邦並非現代國家,而係部落遷徙然後定居,再發展出嚟。部落嘅排他性非常徹底,完全以血緣劃界,成員只會來自同一祖先嘅幾個氏族,希臘城邦幾乎完全繼承呢個特徵。

當時城邦公民身份封閉到不得了,所以根本冇移民嘅概念,外邦人嚟到城邦之後,無論幾傑出,都唔會取得城邦公民資格。例如希臘三哲都係喺雅典教哲學,其中蘇格拉底同柏拉圖都係雅典公民,但亞里士多德嘅哲學成就唔差得過前面兩位,而且係亞歷山大大帝嘅老師,又開學堂教哲學,居然從來冇取得過雅典公民身份,喺現代嚟講都幾出奇,現代國家莫講話對國家有傑出貢獻嘅偉人,就算本來揸嘅只係工作簽證嘅普通人,都有機會拎到國籍與及全套公民權利。但係希臘城邦就係咁納粹,你唔係阿利安人...吖,應該話唔係雅典人嘅話,你身身世世都唔係雅典人,呢一點所有城邦都係一樣。

一開始我講過,人嘅身份有內外之分,亦有上下之分。希臘城邦入面上下之分係乜嘢呢?就係奴隷、農奴之類,永遠唔會做到公民。而通常公民之間亦有等級劃分,等級之間亦不能僭越。即使雅典公民有同等政治權利,到行軍打仗嘅時候,亦要按照財產劃分,有錢人可以騎馬做騎兵,普通人就要落地做方陣步兵,窮人就要做冇裝甲嘅輕裝步兵或者水手,就算你武功蓋世,只要你係最低層嘅公民,都要喺戰船入面划槳。


封閉公民身份,提高城邦凝聚力但限制發展

希臘城邦源於部落傳統,因此公民劃分亦帶有部落色彩,只睇血緣關係,極之排外,就算係納粹都唔會封閉成咁。以現代人嘅眼光嚟睇,呢啲就係封建落後,連意大利黑手黨教父都收契仔,啲古希臘人竟然文塞到咁...

不過,正因爲封閉,所以有現代國家難以想像嘅凝聚力。最少係伯羅奔尼撒戰爭之前,希臘城邦嘅凝聚力極強,公民幾乎人人爲國盡忠,永遠同城邦榮辱與共,一言以概之,即係“公民即國家”。呢種凝聚力喺戰爭時期特別有用,佢哋面對外敵,城邦內部可以團結一致,死纏爛打,直到敵人知難而退爲止。例如波希戰爭嗰陣,波斯人喺溫泉關以幾十萬大軍進攻得千分之一數量嘅希臘聯軍,竟然足足被阻擋三日;雅典城被波斯人佔據,但雅典人並冇投降,反而喺全體撤離雅典城之餘聚集海軍,喺薩拉米斯海戰大破強大嘅波斯艦隊。呢種成就,只有希臘城邦先做得到。

不過希臘城邦之所以能夠以小勝大,仲有另一個原因,就係佢哋本身就好戰成性。呢個特質,結合埋公民身份對外、對下都絕對封閉嘅性質,就有一個後果:人力不足,發展嚴重受限。又以雅典爲例,雅典曾經稱霸愛琴海,半個希臘都以佢馬首是瞻,但佢嘅公民數量真係少到嚇親人:就算係鼎盛時期,都只有約六萬人。六萬人,香港搵四、五個大型屋苑,居民數量都一定多過呢個數字。所以佢哋無論打贏幾多仗,都冇辦法徹底控制勢力範圍入面所有城邦,更加唔駛講將呢啲小城邦同化,變成一個大雅典,因爲六萬人實在太少,如果分成幾十個小部隊,分散喺海岸線複雜嘅希臘入面,好容易就會被逐個擊破。而雅典人又唔會開放公民身份,俾任何非雅典人,或者人數比公民更多嘅雅典奴隸。斯巴達嘅情況一樣,佢哋嘅步兵戰鬥力超群,但係公民數量更少,所以即使擊敗雅典成爲新霸主,都冇辦法長期維持霸權。

每個希臘城邦嘅權力基礎,只有幾百至幾萬個公民,而公民嘅增長方式又只有自然增長一個方法。所以任何敗仗對城邦嚟講,都係一個巨大嘅災難。雅典就係因爲喺西西里全軍覆沒而衰落,但事實上,佢哋損失嘅只係大概三萬人,如果係其他型態嘅國家例如波斯帝國,或者係當時嘅北方蠻族,佢哋好多時輸一場仗就死傷被俘共十萬人,然後好快又可以聚集兵力再打一仗。但係對雅典人嚟講,就等於死咗一半以上嘅公民,立即做成希臘世界巨大嘅震撼,足以成爲佢哋所有敵人撕毀和約重新開戰嘅充分理由。最後,經過連年戰亂之後,希臘城邦嘅呢個缺點,令希臘始終一盤散沙,無法抗拒馬其頓、羅馬嘅征服,而希臘城邦亦成爲歷史陳跡。