將港英餘孽同國泰美心擺埋一齊，可以話夾硬，但如果由中國嘅角度睇，可能係有關係。今次嘅抗暴之戰，中國對呢兩樣野嘅觀感與及鬥爭，個人猜想可能就係其中一條暗線。
首先講"港英餘孽"。呢個詞，97前後成日聽，但係而家好少講，所以後生仔女唔知係乜，都唔出奇。
睇維基，港英餘孽"其意思指英屬香港時代，執政當局工作或培育出來的公務員、立法局議員、行政局議員；從建制派的觀點來看，是指西方的代理人或西方的傀儡。 " ❨https://zh.m.wikipedia.org/zh-hk/%E6%B8%AF%E8%8B%B1%E9%A4%98%E5%AD%BD❩，睇落好籠統，但或者正因為咁，所以對香港黎講，先至咁大殺傷力。
"港英餘孽"同中國關係最僵嘅時候，就係回歸前中英之間對過渡安排嘅爭論。爭論啲乜，其實喺而家嘅香港人黎講，係過左去嘅問題，但對中國黎講，港英餘孽跟住衛奕信起新機場，中國驚俾英國佬駛晒啲錢；配合彭定康搞普選，又廢除多條法例，中國更認為係喺主權移交前搞破壞，令香港政制喺97前後不能銜接，結果中國另設臨時立法會，七一後立即將彭定康年代廢除嘅惡法還原。甚至當年江湖傳聞，陳方安生係為左做下一任特首，先至過渡做布政司司長，然後就逼走陳方安生。
有鑑於此，中國對港英時代遺留落黎嘅官員同議員，甚至整個制度，都有相當敵意，就不足為奇。但係另一方面，中國又不得不用呢啲舊人去令特區政府維持運作，甚至不得不用"港英餘孽"入面嘅主要成份---AO出身嘅官員去做特首。所以表面上，中國日日都話支持特區政府施政，實際上恐怕並非如此，雙方可能係互相利用之餘又互相厭惡。尤其曾蔭權嘅下場，更令政府中人心寒。
譬如逃犯條例修訂同埋之後嘅鬥爭，由我呢啲街外人睇，唔係只有特區政府同示威者鬥，中國同特區都可能鬥緊，所以林鄭先會喺會議爆大鑊，再有錄音泄漏俾路透社。至於中國就一直暗中逼特區政府企硬，令特區政府無法透過政治方式解決問題。坊間有人認為而家嘅亂局，係特區政府執行中國指示所致，但點解中國要咁指示？可能因為港英餘孽始終係港英餘孽，令人痛恨，最好就係同示威者鬥到兩敗俱傷；點解特區政府會強硬到底？可能因為對中國低能又帶有惡意嘅指示煩厭，所以索性用最殘暴嘅手段，去敗壞中國嘅名聲…
既然中國對理應係自己下屬嘅"港英餘孽"都諸多猜忌，咁對於英資嘅怡和太古，應該都唔會當無野。尤其是，怡和同太古，係揸住一啲香港重要企業，例如怡和手上有惠康，7-11，美心，萬寧，pizza hut，香港Ikea，文華東方酒店等；太古則持有國泰。
可以合理咁懷疑，中國會將呢啲老牌英資當成全面管治香港嘅障礙，畢竟非我族類，其心必異…但係點解呢啲英資會支持所謂"止暴制亂"呢？錢，固然要揾，但更有可能係，面對中國嘅政治威脅，與及國企中資嘅競爭同惡意收購壓力，佢地似乎無辦法唔做馬前卒受靶。於是，就會見到美心太子女高調摟打，與及國泰肉酸炒人。而中資國企呢，就係咁意登下廣告撐政府，然後繼續靜雞雞做生意。結果係，國泰變成沒有國泰，美心就日日裝修。
當然，上面呢啲都只係我個人嘅猜測。但係中國一向都只能用文攻武嚇同銀彈(認真，佢無得唔用，民族主義，極權加個人崇拜，對外人嘅吸引力係零，所以中國嘅軟實力非常疲軟，只要唔自認中國人就好難認同佢地嘅所作所為)，因此被中國威脅嘅人好難無任何動靜，但又敢怒不敢言，只可以含住一口冤氣，做世上最肉酸核突嘅掙扎同反抗。
呢個玩膠宣言…唉，先唔講點解無革命黨同革命軍，無警察叛變，無外國軍隊，都可以成立臨時政府嘅問題。
宣言第一段就完全錯誤。幾千年來，人類並不喜破舊，只喜懷舊，華夏言必堯舜三代，西方言必希臘羅馬。破舊立新，乃工業革命後始能萌芽之思想。就香港而言，多數港人只怕懷念1989年前蒸蒸日上之過去，多於虛無未知之未來。撰寫及和議此宣言者不認同，不足為奇，但最少要明白不歌頌舊黃金時代，並以此為楷模，則在他人眼中，恐怕只見破壞，難見建立。
全篇宣言，僅第二段較可取。但未引用出處❨美國獨立宣言❩，無心之失乎？有心剽竊乎？
之後篇幅就屬於未有黨就搞革命之錯誤，於理於實皆不通。尤其不取消公安條例與緊急法，反而保留2018年前之條文；又只革除副局長以上官員，如此則警務處長反而能留任，更屬豈有此理。香港之惡政，根源在未有雙普選，但具體運作，則在公安條例及緊急法賦予政府之權力過大，與警察腐敗濫暴。撰寫宣言者，難道欲以舊惡法舊黑警，鞏固臨時政府？
自古以來官逼民反，我從未支持暴政，只對反抗與革命予以同情。但若無正確思想指導，則時代革命非但無法光復香港，反而會將香港推入人間地獄。如果此宣言代表革命主要參與者之思想及意見，則我不得不擔憂未來之情勢。無民心暴政即使推翻，卻代之以得民心之亂政，香港將永不翻身。望革命派中有識之士再仔細思量。
到今天為止❨2019年10月2日❩，香港市長林鄭月娥，與及香港武警一同背叛香港和中國，其罪狀顯而易見，甚至不需任何內幕佐證。
1. 逃犯條例修訂，本不應發生。香港經濟，以對外貿易及金融為支柱，非外國認同不可。然則修訂後外國人過境香港，有機會被香港政府拘捕及送到中國受審，已觸及外國最大之恐懼---中國法凌駕西方法；且正值美中貿易戰雲密佈，最需要香港發揮以往"白手套"功能之時，林鄭月娥卻明白告訴全世界，香港不再是白手套。如修例獲得通過，林鄭月娥早已犯下叛國罪：欲借逃犯條例修訂打擊中國。但回顧之後事態發展，林鄭恐怕本就不欲認真推行修例，項莊舞劍，志在沛公是也。
2. 林鄭利用修例引爆民眾怒火，摧毀香港固有政治，經濟，社會秩序，試圖將香港改為極權統治。由六月開始，林鄭未曾嘗試以政治方面解決問題，反而一再加強鎮壓，藉此做成緊急狀態之實；但遲遲不宣布宵禁或緊急狀態令，乃有將緊急措施變為恆常之嫌。恆常緊急狀態，乃古今獨裁者奪權之慣技，而且必會為社會帶來嚴重傷害，此叛港也；而期間及此後持續不斷之暴力，對中國聲譽及信用之傷害，從而為中國增加之困難，更難以勝數。更何況，一個縱容三萬警力行兇之市長，會否隨時抗拒北京號令？
3. 林鄭在會議中泄漏國家進一步控制香港經濟之計劃，又將錄音交予路透社，將計劃公之於世，乃林鄭叛中最明顯之信號。全面控制香港所有重要行業，乃必須秘密，審慎，緩慢推進之計劃，否則打草驚蛇，必會引起外國猜疑及反制。但林鄭輕易言之，又將之公開，顯然有意破壞中國之計劃。
4. 警察有意逐漸升級暴力，逼使港人充滿仇恨，達到養寇自重之目的。鎮壓示威，要不一直將武力封頂，令示威活動自然平息，或者被公眾唾棄；要不一開始就大量殺傷示威者，以臨時緊急狀態防止民眾再次聚集，以求迅速回復秩序。但警隊至今之作為，卻非上述任何一種---六月即已發射催淚彈，橡膠子彈，布袋鋼珠彈等過度武力，卻仍然讓示威者退走，然後七月起就大量濫暴，之後才開始令鐵路停駛，以便搜捕；新屋嶺與太子站之殺人疑陣，更刺激港人怒火。此類措施只能逐漸提升港人之仇恨，卻無助平亂。至昨天首次用實彈射擊，卻無大規模行刑式開火，又是無助解散或逮捕示威者，更不足以震懾示威活動，只會拖長示威浪潮。為鉅額加班費，以及緊急狀態所賦予之特殊權力，警察與林鄭狼狽為奸，殘港人以自肥矣。
林鄭與警察，為錢為權，不惜叛港叛中，殘害港人，陷害中國，固為人中之渣滓也。然其餘權貴名流，政客社運，或公開舔共，支持暴力鎮壓，或誤導港人，使其不明赴死，豈非追逐金錢利益之鼠輩乎？
孟子曰："庖有肥肉，廄有肥馬；民有飢色，野有餓莩；此率獸而食人也！"今之數百萬香港藍白人，上至市長，下至平民，每以器毀物壞而怒，以示威者受傷被捕而喜，稱為"保物殺人"，未嘗不可也。每思及此，乃知國事知不可為，非起義不可矣。
唔知道而家嘅香港人仲睇唔睇高達？
如果事過境遷，佢地有機會睇初代高達，應該會有好深感觸。
有幾多人好似阿寶咁，為自救同保護朋友，被逼反抗？因為觀念同立場嘅衝突，同家人爭炒甚至反目？
有幾多人好似馬沙咁，被人所害失去至親，為報仇又失去更多？
有幾多人好似白色基地嘅船員同難民咁，為避難而流離失所？目睹同伴犧牲但無可奈何？
有幾多權貴好似薩比家咁，到敗亡前依然為爭權奪利而自相殘殺？
今時今日，因為動畫技術嘅問題，應該無乜人會對裡面嘅戰鬥有興趣，但係劇情入面，角色嘅求不得，怨憎會，愛別離，因為鬥爭而激化，無人可以解脫…
不過，阿寶始終係不幸之中有大幸。歷盡劫難，滿手鮮血，但仍然有"家"可歸，有等待佢嘅同伴。唔知係咪製作組嘅意思，但佢得到精神嘅小小救贖，係因為阿寶雖然會因衝動而犯錯，最嚴重試過偷高達出走，但始終未曾受惡念操縱，濫殺無辜；而且佢仍然保留人應有嘅複雜同曖昧，既不如賴巴愚忠，又不若娜娜天真。始終，佢只係別無選擇，被逼殺出個未來嘅少年，觀眾甚至監督都只能心軟，唔希望悲劇收場。
今日❨2019年8月30日❩，特區政府已經拘捕幾個著名前學運領袖，又派人意圖毆打民陣發言人，結果831遊行被民陣以警察反對為由取消；而且之前特首表明不接受五大訴求，又在不公開場合向警隊保證邊不會成立獨立調查委員會，加上近日再三出現入夜毆打，斬人事件，可見特區政府中有人希望製造某種緊急狀態❨而不一定由政府正式宣布❩，促成軍法或獨裁統治。
但究竟是誰參與此進程？又有何目的？以下為幾點無明確根據之猜測。
1. 鄉紳，社團：鄉紳勢力一直在香港政治佔一席位，而社團干預政治，則最遲在梁振英競選特首時，與上海仔有飯局時就開始曝光。兩者都有用威嚇，暴力解決問題的傾向，因此由721元朗站襲擊開始，可能在近期充當打手角色，協助促成緊急狀態，以得到來自港府甚至中國之金錢或政治報酬，並增加政治影響力。但他們的實力應未能凌駕警隊，因此不可能佔主導地位。
2. 警隊：相比鄉紳，社團，警隊作為香港人數最多的武力組織，倒是有能力要脅政府，阻止任何對他們不利之調查，逼使政府為警隊無限拘捕甚至開火權開綠燈，並要求凌駕其他紀律部隊和署局之地位。五大訴求中的獨立調查委員會，如果由警隊強力反對並阻止，實屬合理；但是，除非警隊高層都由殺人狂魔組成，並發展出根深蒂固之濫暴文化，否則警隊不太可能主動要求製造緊急狀態。要爭權奪利，以近期示威活動之頻率及烈度，警隊只需以放軟手腳為要脅即可，不必有系統地濫捕及虐打示威者；此等行為，只會成為日後被追究之證據。因此，警隊近期之暴行，可能出於港府或中聯辦指示，但如果之後突然失蹤，甚或公然抗命兵變，則恐為警隊自保之行動。
3. 林鄭：除了警隊，她對政府其他部門應該仍有指揮權。至於警隊方面，卻不無疑問，一方面，縱容警隊及鄉黑濫暴，會為她招致道德及輿論壓力，但另一方面，如果她旨在利用緊急狀態做成獨裁統治，以長保權位，則有可能指使警隊及鄉黑破壞社會秩序。唯在中美夾縫中，常人恐不欲成為香港獨裁者，以免承受大國之壓力甚至生命安全威脅；同理，如無中國授意，林鄭亦不應令事態升級至威脅一國兩制，否則一旦下台，將被追究罪責。故林鄭要藉緊急狀態以建立獨裁統治，可能僅為自保，狗急跳牆，而且必須確保警察服從指揮；否則，她可能早被架空，或受中國指揮。
4. 中國：中國一直希望香港和平穩定，但不容挑戰一國兩制與國家安全。因此，出於維穩需要，中國可能會力主鎮壓。但要維穩，未必需要以殘暴方式處理，儘管在中國國內，流血鎮壓屢見不鮮，但香港卻為避免國際壓力而鮮見。如今次緊急狀態為中國主導，則可能為中美鬥爭需要示人以強；或中國內部之鬥爭白熱化，希望藉香港動亂，鬥倒其中一派。最壞情況之一，可能是逼香港頒布緊急狀態令，打壓反對聲音，控制互聯網及其他通訊，然後秘密搶奪金管局美金資產，以救空虛國庫於一時。此一假說暫時仍然荒誕，因為如此香港必不能再擔當國際金融中心，對中國之打擊巨大且難以估計；然而若美國之打擊繼續加強，令中國短期內發生金融災難，則中國會殺金蛋鵝止一時之飢，亦不足為奇。
5. 變數---示威方式：示威者當然不能宣布戒嚴或緊急狀態。但是次危機中，示威者放棄任何可見組織及代表，只要有人召集就有人出現，然後完全由現場人士自行決定行動，而且所用武力一再升級。此一現象之後果，不單是對街道及警局之破壞增加，而且導致談判代表無法產生，後者足以令以往政府之分化計策難以生效。這會否導致中國，林鄭，警隊制訂計劃時，受到前所未有之壓力，從而促成緊急狀態之產生？畢竟黃大仙就有警員喝罵途人，叫途人"唔好扮街坊"，這情況就跟民變，或者游擊戰相差無幾。面對普通示威可以只維持秩序，但面對反政府游擊隊呢？
6. 變數---外國干預：儘管一直有傳示威者收外國錢搞事，但在此根本不必討論此荒誕傳說。外國干預之形式，往往在於以人權為由，制裁中國及香港，甚或逼使香港從速雙普選---中國顯然視之為和平演變，顏色革命之類重大國家安全威脅。其中美國跟中國早已展開貿易戰及網絡戰，故此特朗普直指香港為新冷戰中之西柏林。外國干預可能令中國或林鄭在制訂計劃時，添加時限壓力：例如應該怎樣在美國國會重開，十一70週年國慶，或者中國經濟危機無法掩藏前，將香港危機解決，以減少外國干預之藉口和壓力？甚至在被逼准許香港推行雙普選前，林鄭該如何逃亡？中國應如何搶走香港美金？
以上為本人猜想六個參與者怎樣促成緊急狀態，與及背後之動機和盤算。因本人並非當中一份子，故無法證實當中是非真偽，只希望盡述本人所見所聞，以供各位參考。最後，星星之火，可以燎原，各方之盤算可能會做成意外後果，敬請保持小心，警覺。
Sir Michael Kadoorie嘅公開信內容之誠懇，立意之真摯，為其他公眾人物所無。而且，佢嘅家族紮根香港百幾年，可能佢地比其他香港人更香港，更清楚香港係乜野，以及香港需要乜野，呢幾樣喺公開信都充分表現。最難能可貴嘅係，佢公開表示，唔可以令年青人絕望，年青人係未來嘅希望。相信對於年輕示威者黎講，總算得到一絲安慰。我在此衷心感謝Sir Michael Kadoorie對香港全體命運嘅關心。
可惜，即使係嘉道理家族，都無辦法解決一個問題---信用問題。佢希望香港人可以一如以往，用互相尊重，理解及公開對話解決今次危機(原文為mutual respect, understanding and open dialogue)。簡單黎講，就係希望雙方和談。但和談嘅前題係乜野呢？以我有限所知，有三個：
1. 雙方都要可信
2. 有強力嘅第三方保證協議執行，及防止報復行為
3. 有一個雙方都能勉強接受嘅界線
由於今次香港危機，已經變成美中冷戰嘅一部分，而美中以上亦無更強大嘅國家或機構可以調停，所以2. 係無可能存在。至於3. 亦不存在，因為5大訴求對示威者黎講，係缺一不可嘅底線，否則任何1條都無可能確實執行；而對政府而言，哪怕只係接受最小兒科嘅撤回逃犯條例修訂，都好可能導致現屆政府管治全面崩潰。
而最大嘅問題，係1. 雙方都認為對方完全不可信。
喺示威者眼中，特區政府從來都唔係用民主方式產生，所以先天已不可信；具體到而家呢一刻，示威者同公眾，唔通可以相信林鄭同警察？林鄭由社署署長，發展局局長，政務司司長，直到特首任內，所作所為，劣蹟斑斑，大話連篇，甚至公開聲稱示威者喺香港"no stake"，將香港人當成古代嘅奴隸，毫無權利可言。至於警察，打示威者就大大力，拉到警署同拘留所之後更係無惡不作，而對黑社會打人斬人，就喺現場視而不見，事後消極應對，而每日嘅記者會更加變成真理報同人民日一樣，只有謊話連篇。咁嘅特首同警察，對明眼人黎講，點信得過呢？
掉返轉，喺政府眼中，示威者究竟係乜野人？一班永遠蒙面，無領導，無代表，無組織，因此連談判對像都無，面目模糊嘅人。政府可以捉個別示威者然後施以酷刑，但係無辦法喺被捕者入面揾到代表；而台面上嘅反對派，就根本無任何組織可以代表大部分示威者，甚至大部分傳統政黨，一出現就會被前線示威者鄙視，對外措辭稍欠強硬，都會被口誅筆伐，如果想制止破壞，就更加會被推走。咁，點樣揾可信嘅對手去談判❨利用❩呢？就算有代表出黎，稍有讓步都好可能即刻被鬧走，然後示威繼續無法平息。
即使嘉道理家族碌爆人情卡，勉強營造出一個真正嘅談判平台，去解決2. 同3.﹐但無論如何，都唔會有可信之人去進行談判。而呢個現象，係由呢二十幾年來嘅政治失敗造成，而失敗嘅癥結，就係中共反對雙普選，反而設計出小圈子特首選舉，立法會嘅比例代表制同功能組別。於是，特首以下，全政府都大行親疏有別，只有中共代言人同富豪"have stake"，其他香港"have no stake"；反對派不斷分裂，又或者係喺比例代表制入面，反對派本來就唔應該團結，結果莫講話政權交替，連為民請命都難於登天。如此為政，令上流腐敗，中產供樓供到暈，低下層朝不保夕，就算香港人仍然充滿"Lion Rock Spirit"，佢地嘅"energy, ambition, drive and creativity"究竟可以做啲乜呢？揾錢移民，定係玉石俱焚？
既然而家嘅危機甚至內戰，係源於中共佔據香港前後近三十年來，政治失敗做成嘅大分裂，咁之後嘅發展，應該唔會返返去2018年嘅狀態。一國兩制已經瀕臨崩潰，而之後嘅發展仍有變數。香港究竟會係將所有示威者拘捕，令佢地變成廢人或者死人，然後變成中共直轄市或者由中共扶植嘅極權特區呢？抑或喺外國幫助下，得到真正嘅民主同自由，擺脫中共嘅黑手呢？呢樣相當有賴香港嘅權貴會點樣行動。而嘉道理作為真正植根香港嘅偉大家族，我衷心希望佢地可以作出最合乎佢地同香港共同利益嘅行動，令香港可以真正成為"this generation, the next, and beyond"嘅美好家園，正如一直以來嘉道理家族對香港作出嘅無數貢獻一樣。
最後，祝Sir Michael Kadoorie身體健康，心想事成，嘉道理家族繼續興旺。
普通市民
Jacky
事到如今，一個組織係必然出現。但係，同泛民嗰班舊電池，揾食主義者，間諜所講嘅大台完全無關。
假設內戰嘅結果，係香港脫共，喺外國監護下，準備雙普選。然後，出黎參選嘅就只有泛民嗰班舊電池，揾食主義者，間諜；唔要佢地嘅，就得返啲有錢佬代言人…講真，各位前線示威者見到，真係揀得落手？至於城邦熱血，相信好多人都覺得有問題，雖則我都唔知係乜問題…
揀黎揀去，所有19年之前出現過嘅人入面，其實好多人都係想選本民前，但係佢地喺外界眼中，除左掟磚同青靚白淨，仲有被迫害，幾乎乜都無，而且最少喺表面上，佢地喺呢場內戰入面，係完全缺席；至於真前線嘅蒙面人，內戰勝利之前，有邊個可以現真身呢？
講左咁耐，其實現時嘅問題除左贏，仲有贏左之後邊個收拾殘局嘅問題；而且，呢兩個問題係有關連嘅。外國就算有心出手，協助喺香港推行新體制，但見到嘅都係一班本來就無心奪權嘅人，只怕唔會肯出太多力---明明打緊內戰，但呢班人淨係想選議員，連特首都唔想選，咁究竟撐黎做乜？幾十個議員嘅力量，連功能組別都取消唔到啦！又點樣保障外國在港利益呢？
所以，呢度講嘅組織，事實上係一個代表前線示威者，為左實現五大訴求，從而代表全港利益嘅奪權組織，佢地應該會慢慢透過各種行動，去準備奪權：
1. 利用或製造台面上嘅政治明星，呢啲係用黎sale俾香港人同外國政府睇嘅；
2. 建立同宣傳一種香港未來嘅意識形態同藍圖，作為指導嘅思想；
3. 加緊與外國談判，意圖透過外國勢力扭轉香港局勢。
最後，係一個利申：我係愛國愛港嘅人，以上嘅組織唔好揾我，我實報警…
香港治亂之源與未來
自南京條約始，香港即為商埠，列國互通有無，商賈盆滿缽滿，徙民兩餐溫飽。二十世紀以降，雖有日軍侵港，致有三年八月之難；胥吏貪瀆，促成六七暴動之劫；然劫難渡盡，香港仍能粗安。
所以能粗安者，曰泰西之英吉利，曰港督府之法度，曰徙民之堅忍。泰西之英吉利，保香港免遭禁運；港督府之法度，保商賈徙民之生計；徙民之堅忍，保列國官商之周全。三者如大廈之三柱，去此三柱，香港大廈必傾矣。
然近三十年來，香港局勢大變。泰西之英吉利去，北國之共產黨來；有法度之港督府撤，無法度之特區府立；堅忍之徙民，化為義理之定民。三柱俱歪，香港頓成危樓。
近年，大廈危而未傾之緣由，曰共產黨之不敢，列國之不忍。共產黨欲長久利用香港，以無信用之人民幣匯兌有信用之美金，不敢大變港督府之舊政；列國投資香港百數十年，不忍財產毀之一旦。居此危樓，特區府非小心周旋，謹慎固守，緊守法度不可。
惟特區府自始即無法度。概論之，曰兩偏幫，兩忽視。偏幫北國，忽視列國香港，所以有二十三條，千億高鐵大橋；偏幫巨賈，忽視平民，所以有高樓價，低工資。
兩偏幫，兩忽視，禍港殃民，路人皆見。然特區府視約無睹，乃假選舉之過也。假選舉者，北國素與泰西不睦，鄙視泰西文明，忌憚泰西控制香港，乃勾結巨賈，控制特首選委，壟斷立法會功能組別也。且立法會尚有泛民一類，表為反對黨，裡為維穩黨，嘗力主民主回歸，使香港入北國之手也。是已兩偏幫兩忽視愈演愈烈也。
至二零一九年，北國與美利堅交惡，乃指使特首修訂逃犯條例，藉以北國之司法，打擊在港泰西勢力與反對派。列國官商大懼，欲加緊制裁北國，禍及香港，義理之民為保香港，和平示威有之，衝擊特區府有之，乃至七一立法會之役，毀特區徽，懸港英旗，以吾觀之，皆因特區府無法度，大廈將傾也。
吾以為，必欲救香港之將傾，惟短中長三策兼用之。短策者，撤回逃犯條例修訂，以撫列國官商；放棄控告示威者，以慰義理之民。中策者，特首掛官，代之以北國、美利堅皆認可之人物，以示誠意。長策者，加緊重啟政改，五年內特首，立法會皆由真普選產生；修改基本法，香港不必維護北國之國防與主權，特首，議員，法官不必北國任命，駐港解放軍減至一百人，並建千人香港兵團。非兼用三策，必不能取信於列國與義理之民也。
香港之粗安，起於以泰西之一城而納北國；香港之漸亂，起於以北國之一城而拒泰西。必欲長治久安，則香港須守中立，以兼納泰西北國。還請諸君努力，守護香港。
