悼李旺陽

李旺陽先生是何許人，不才真的不認識，只知道他跟大部分中國人不同，從未享受過中共“崛起”的好處，反而一直身受中共的殘暴虐待；也跟大部分民運領袖不同，他一不是學生，二沒有逃出或保外就醫，三是在大陸慘遭謀殺。也許，從這些不同，可以看出他真是鐵錚錚的硬漢，中共都沒有辦法，只好索性殺人滅口......

他在一九八三年開始辦報，在八九年聲援學生，搞追悼會，然後就被長期囚禁，屢遭酷刑，第二次釋放後不到幾天，就在六月六日早上被謀殺。可以説，他的後半生就是中共暴力的寫照；而根據他的生平，他前半身所親歷的中共大事，恐怕更包括中共不願多提的毛時代暴行，爲此而死的人不可勝數。要是普通人、甚至是一般的民權分子，已經要大喊“來生不做中國人”了。但是，他卻沒有後悔，在被害前數天接受有線電視訪問，他已經又聾又盲，還是如此説：

就算砍頭我也不後悔！爲民主，國家興亡匹夫有責！...我就算砍頭我也不回頭。

此等毅力，我等實在未能企及。不才以爲，生者能夠做的，只有繼續爲自己的地方爭取民主自由，直至成就大業爲止。

各位讀者，我等現在未能令中國得到民主自由，但香港的民主自由卻在伸手可及之處。請各位以李旺陽先生的堅毅不屈爲念，奮鬥到底。

李旺陽先生生前接受有線電視訪問

http://cablenews.i-cable.com/webapps/program_video/index.php?video_id=12128020

中女詩中總是情

不才新識嘅飛卜朋友白蓮達姐姐，最近出咗本詩集，叫做<<中女情懷總是詩>>，入面有佢多年來嘅作品，總共41首詩同2篇散文。今日白姐姐喺佐敦麥記搞詩歌分享會加生日會，不才有幸可以參加，而且得到白姐姐親筆簽名詩集一本，終於可以欣賞佢嘅文學才華。

白姐姐自稱中女，不才好同意架，不過呢個中唔係形容年紀，而係解“秀外慧中”。秀外就無需多講，由佢清麗脫俗嘅外表就見得到。至於慧中，就要睇睇佢嘅詩究竟寫啲乜喇。

白姐姐最出名嘅一首詩，係今年年頭嘅“反D&G霸權”，大家都知道呢間廣東道名店係幾咁囂張，竟然唔俾香港人影相，最後被幾千人不斷圍住嚟影。呢首詩最後幾句係咁嘅：

或許你記不起

何時開始駐足本地

然而你應告訴我們

何時打算撤離

呢幾句，真係講出當日大家反對D&G嘅心聲，呢間公司侵犯公眾權利、賺大陸人錢之餘藐視香港人，最後終於喺群情洶湧下讓步。

當然，白姐姐嘅詩唔係淨係義憤填膺，更加多係對香港、對人生、以至對各種事物嘅感慨，而且由呢啲詩入面，可以見到佢豐富但內歛嘅感情，敏銳嘅觀察力同好奇心。例如“珠頸斑鳩”一首詩，甚至可以見到白姐姐想同雀仔玩、但雀仔唔理佢嘅滑稽場面：

過客如我

模仿你的叫聲

而你

竟無暇看我

而不才感受最深嘅一首詩，係白姐姐紀念亡父嘅“再來的時候”。幾乎人人都有阿爸湊大，所以下面嘅場面應該唔陌生：

曾經，你和母親吵架

帶我離家，你不曉得應往哪裡去

然後

我們看電影

我們吃大排檔

很晚很晚

我們才回家

不才都記得有幾次，阿爸同阿媽嗌交之後，同阿爸、細妹三個一齊去茶餐廳食嘢，所以好有共鳴。而對白姐姐嚟講，亡父最後帶俾佢嘅嘢，可能係對無可奈何嘅死亡當中一絲安慰：

你生活過得富足麼？我們無法知道，然而

從你堅定的目光

我們相信

你已在外面的世界展開新生活

相信有堅強嘅阿爸，面對喪父之痛嘅時候，都可以容易接受少少...不才雙親健在，實在未知到時可唔可以咁放心。“再來的時候”寥寥數句，已經將亡父平凡但堅強嘅形象寫得入木三分，希望大家可以一讀再讀。

有人稱呼白姐姐係香港城邦詩人，讚佢以詩歌紀錄香港、抒發香港人對政治社會嘅不滿。呢點不才亦同意，但不才更加珍視白姐姐嘅豐富情感，喜愛白姐姐嘅真摯筆觸。

强行中止拉布愚不可及

今天早上，曾鈺成應黄宜弘要求，宣布中午終結辯論，下午開始就修正案表決。在不才看來，這種強行終止拉布的做法有五大不智，非常愚不可及，從各方面來看都只會帶來反效果。




第一不智，是破壞規則。曾鈺成援引議事規則去辯解，但這條規則是甚麼呢？就是議事規則第92條：



”對於本議事規則內未有作出規定的事宜，立法會所須遵循的方式及程序由立法會主席決定；如立法會主席認為適合，可參照其他立法機關的慣例及程序處理。”



但是這依然不能使他的決定完全符合規則。首先大家可以即時留意到的問題，就是曾鈺成並未提出參照了哪個立法機關的慣例及程序，去終結辯論，此疑問尚待解釋。



另一個更應質疑的程序問題，是議事規則第58條”全體委員會處理法案的程序”(12)中有以下條文：



“全體委員會於完成審議法案的所有程序後，須回復為立法會，並由一名議員就該經修正或無經修正的法案(視屬何情況而定)，向立法會作出報告。”



所謂”所有程序”，可能比較複雜，但是顯然在議員未曾討論所有修正案之前，並不應隨便宣告完成所有程序。曾鈺成可能是利用第92條的含糊之處，去掩飾違反第58條(12)的錯誤。當然，這只是不才的個人意見，以不才對法律、議事規則的有限認識，很可能有誤，上述不宜作為法律意見，如有謬誤歡迎指出，不才定當虛心受教。



第二不智，是違反政治原則。議會政治一大功能，就是要透過議員的辯論，讓公眾知情，及令每條法例都得以完善。此所以讓議員在議事規則許可範圍內，得以暢所欲言，是議會政治的重要原則。曾鈺成剝奪議員發言機會，以節省修訂案審議時間，違反了此重要原則，終將使議會尊嚴掃地，當然跟功能組別及分組點票相比，只算是最後一根禾草。



第三不智，是損害政府及梁振英形象。本來政府先提替補機制，後改為現在議員辭職後六個月不得參選的草案，已經展現反民主的形象；到昨天付款請臨記、甚至疑似黑社會人士搞反拉布集會，則有96年前袁世凱用軍警及”公民請願團”包圍議會，逼令議員支持復辟帝制的苗頭。無論如何，此等做法以現時政府而言不算新鮮，但立法會主席突然終結辯論，以騰出時間讓五司十四局改組議決，如此偏幫梁振英，實屬回歸以來首次。即使成功達到目的，但卻令梁振英未上台先得罪人，而且主動危害三權分立，意欲何為？



第四不智，是激起民憤。以上三項早已激起民憤，而曾鈺成中止辯論的時機之差，更適足以推波助瀾。本來拉布就是曠日持久、惹人煩厭的消耗戰，以港人記憶力，專注力之短暫，儘管昨晚工黨加入拉布，看似聲勢正盛，其實只要再過三四星期民情就會大幅逆轉，嫌棄議員”講來講去三幅被”，到時終結辯論就顯得(只是顯得)合理。但是現在終結辯論，就像球證為保領先球隊勝果，不惜在30分鐘就吹完場鷄，這豈不是將假波陰謀清楚展現人前？如此民情豈能不反彈？



最後一不智，其實不單指曾鈺成的行為，而且包括政府，共產黨十五年來倒行逆施之舉：一個沒有民主自由，沒有三權分立的香港，也就沒有和平穩定可言，從而對中共、甚至全世界也就沒有功用和貢獻可言。曾鈺成此舉，就像將香港再推一把，讓她更快跌入”中國城市”的深淵，至於這有甚麼不幸後果，大家可以參考香港城邦論，或者沈旭輝先生對香港次主權的論述等，在此不贅。



力陳五大不智後，讀者又應如何作為？除了鼓勵各位多參與社會運動，投票時作出最好選擇外，對此，不才實在沒有更好的建議。然而，不才必須提醒各位，不要對香港將來數年的命運有任何遐想，鬥爭及逼害只會愈來愈可怕；當三權的上層中所謂”港英餘孽”被換走，變成紅色分子，香港將會加速大陸化，曾鈺成這次終止辯論，只是其中一個事件而已。

吳起隨想．二

我個人嚟講，係幾欣賞吳起寫嘅兵法《吳子》，但如果講起吳起嘅人品，就只能話係不敢恭維。喺《史記》作者司馬遷筆下，佢係講一套做一套、爲求目的不擇手段嘅典型反面人物。

佢喺離開家鄉衛國，啱啱出道嘅時候，就已經做出能人所不能嘅惡行嚟博上位。“事魯君。齊人攻魯，魯欲將吳起，吳起取齊女為妻，而魯疑之。吳起於是欲就名，遂殺其妻，以明不與齊也。魯卒以為將。將而攻齊，大破之。 ”雖然古代亦有好似劉備咁，聲稱“兄弟如手足，妻子如衣服”嘅男人，但係去到殺妻以取信魯君，實在係非一般人所能想像嘅殘忍。難怪之後就出現對吳起不利嘅流言，令佢被魯君再次起疑---其實當中一啲内容，例如爲功名而不服母喪，甚至殺死恥笑佢嘅同鄉之類，以佢後來嘅作風嚟講，可能並非虛構。不過，更加重要嘅原因，相信係因爲魯國係古國，自有其源自西周初期嘅禮法及政治秩序，最忌憚吳起呢個野心勃勃嘅外國人。所以即使齊魯之間繼續有戰事，啱啱收拾“三桓”正式掌權嘅魯穆公都唔敢再留吳起。

好啦，東家唔打打西家，吳起喺戰國初年嘅亂世，仲有好多選擇。結果，佢去咗當時啱啱“三家分晉”而出現嘅魏國。

當時，吳起殺妻拜將嘅事跡可能已經非常有名，所以魏文候問相國李悝嘅時候，李悝都話吳起“起貪而好色，然用兵司馬穰苴不能過也。”當中嘅貪，可能係貪功、貪名，但無論如何，都肯定係殺妻拜將一事所得出嘅評價---唔只貪功名，仲要不擇手段，但魏國當時並無類似魯國一樣嘅禮法同政治秩序可以鞏固國本，所以必須靠各地人材爲魏國效力，吳起卒之獲得重用，得到不少偉大嘅戰績，獲封河西太守，呢個可算係佢最風光嘅時候。

但係好景不常，魏文候死後輪到個仔魏武候做國君，吳起嘅權勢就開始衰落。雖然吳起曾經講出“在德不在險”嘅著明勸諫，但係顯然佢唔知道，德，唔單止講道德，而且講人和---“人和”呢個詞語，係稍後嘅孟子講嘅，但吳起學儒家嘅輩份比孟子更高，照計冇理由未聽過孔子嘅名句“夫仁者，己欲立而立人，己欲達而達人”《論語·雍也 》如果佢真係明白而且身體力行，就唔會有以下嘅事件出現：

魏武候搵新相國，結果唔搵大熱門吳起，反而爆大冷搵咗田文，於是吳起唔忿氣，就搵田文出嚟，不斷講自己有幾威水有幾犀利，田文拍馬都追唔上；但係田文只係講咗一句就另吳起冇聲出：“主少國疑，大臣未附，百姓不信，方是之時，屬之於子乎？屬之於我乎？ ”顯然，吳起冇辧法穩固國家，令國君安心，大臣放心，百姓有信心，反而會令魏國崩潰。以吳起嘅政治同軍事才能，唯一會令佢爲魏國帶來災難嘅原因，只可能係佢爲求目的不擇手段嘅作風，足以令所有人疑心。結果，吳起冇幾耐之後就因爲一啲政治問題而被逼出走楚國。

去到楚國，吳起得到楚悼王賞識，破格委任做“令尹”呢個一人之下萬人之上嘅職位。有幾破格？令尹係楚國百官之首，歷來只會由楚王親族擔任，只有吳起同埋二百幾三百年前嘅彭仲爽係外國人。楚國幾百年來都未試過有外國人做令尹，可想而知楚悼王係幾咁仰慕吳起。

可惜楚悼王嘅賞識，最終反而爲吳起帶來殺身之禍。因爲楚國幾乎同魯國一樣古老，而且同衛國、魯國甚至魏國唔同，楚國並非周代嘅封國遺留，而係南面嘅楚文化獨立發展而來；更重要係楚國嘅貴族勢力非常強大，而吳起嘅政治理念同法家李悝比較接近，所以一到楚國就搞法治、削弱貴族嘅措施，“明法審令，捐不急之官，廢公族疏遠者 ”結果當然成爲楚國貴族嘅仇人。楚悼王一死，吳起就冇咗最後嘅靠山，被楚國貴族射殺。楚國貴族對佢嘅怨恨之深，可見於佢哋寧願誤中楚悼王屍首因而被夷族，都唔肯放過吳起，可見一班。

卒之，講完吳起嘅故事。如果我係電視節目主持人，可能會話吳起雖然有聰明才智，但係作風不擇手段，口講仁義而實際上“刻暴少恩 ”，我哋應引以爲鑑......

不過，我並唔係主持，無需講呢啲行貨嘢。我真正想講嘅係，專橫霸道、爲達目的不擇手段嘅作風，喺某啲時候其實並非壞事。關鍵係，喺古代、亦僅限於只有專制政治一種體制嘅中國古代，如果當事人係喺危急存亡之秋，爲一己以外嘅偉業行事，咁可能尚可接受；否則就係不可原諒。喺咁嘅角度，吳起嘅行爲道理有虧，但最少一直盡全力，爲佢所侍奉嘅國家打勝仗、改革弊政。戰國以後，可以同吳起一樣，並非皇帝但可以用強硬或者霸道嘅手段去進行改革嘅人實在好少，反而弄權、把持朝政而令嘅在所多有。少數可堪比較嘅包括張居正，佢嘅目標同樣遠大，希望改造明朝，下場亦唔好得過吳起幾多，雖然權傾朝野甚至自稱攝政，但死後下場非常可悲，全家皆受牽連，阿媽同幾個仔或死或充軍，原因同吳起被殺一樣，就係樹敵太多，加上唯一靠山死咗或者轉軚---呢個唯一靠山，就係楚王同皇帝。但掉轉嚟講，喺楚國、明朝呢啲制度又舊又霉、貴族或官僚山頭林立嘅國家，唔係咁霸道甚至偏激嘅人，點會肯走出嚟做得罪99%大人物嘅變法派？

正因如此，我認爲現代民主制度可貴之處，就係改革者可以有更好嘅方式去進行改革事業，而且只要唔犯法，依然可以全身而退。現代民主制度嘅彈性同修服能力，就係由此而來：無論改革者係乜出身，只要法案係可以喺議會提出，就無需驚法案被否決之後會被報復，因而失去生命財產嘅安全同自由。而且除咗少數不世出嘅天才，否則多數情況下，改革者亦不過普通人，因此喺議會同政黨集眾智立法，效果實勝於一言堂嘅霸道作風。最後，好多改革措施都係需要長時間先可以見效，而透過現代民主制度喺議會立法，就可以確保法案將會持續執行，唔會受皇帝嘅生命長短、或者係佢嘅政治立場變更而中斷。當然如果立法後發現有問題，亦可以喺議會用投票方式修訂或廢除，而且過程不見血，對所有改革者都有起碼嘅保障。

正因如此，吳起、張居正之類嘅霸道改革者，同埋佢哋嘅悲慘結局，只會喺專制政治出現。現代民主制度可以令其他改革者以更文明、更安全、更持久嘅方式---議會制度，去推行改革，對我嚟講，實在係人類各種偉大成就嘅基石。

懇請民建聯諸君爭取”豁免二次創作刑事化”

好啦，我向大家自首，下面呢篇真係一篇潮文嚟。當然，大家推上報，推到成功爭取"民建聯成功爭取豁免二次創作刑事化"，都無妨。

懇請民建聯諸君爭取”豁免二次創作刑事化”

致 民建聯諸君：

各位好。不才作為網民，對最近《2011年版權（修訂）條例草案》之中，含有刑事檢控網上侵權行為，並將網民「惡搞」等屬二次創作的作品列入侵權範圍，深感不安，如鯁在喉不吐不快，故希望 貴黨可以香港和諧穩定為念，爭取將二次創作列入豁免刑事檢控範圍，並獻有助維持香港穩定之小策，冀諸君明鑒。

現今香港及內地皆面臨變局，維持穩定乃最大要務。然而，若草案通過，則會導致以下弊害，不但網民，甚至 貴黨、香港及大陸，均身受其害。

首先，諸君應當認清，香港人及當中的網民，大多數均非堅決反共者，即使是支持民主派者亦是如此。然則為何近年激進民主派聲勢日盛呢？唯一原因只能是，過去數年，特區政府之弊政已經令不少港人在政治及經濟上受損，逼使他們作激烈反抗。而是次草案，特別是授權政府刑事檢控二次創作之部分，恐將數以十萬計的網民推向激進派，令社會失去和諧穩定。

諸君不應認定，部分網民本就不喜 貴黨，即使以法例嚇阻惡搞，甚至將之拘捕亦無妨。此中不但有罪不罰眾及檢控困難之考慮，還有網民前途受威脅下，會作出更激烈對抗之可能。若網民因share或改圖而受檢控，最終判監及留案底，則前途已毀，最終或變成隱青宅男宅女，加重社會負擔；或變成激進民主派支持者，而判監經驗則成為令激進派鼓舞之鬥爭經歷；或因失去人生目標而為不法分子利用，危害治安。如此，草案加上執法人員之苛刻檢控，就會使滋事分子及依賴福利者增加，為社會增添亂源。

其次，諸君不應忘記，此草案於2011年6月3日刊憲，查當時之商務及經濟發展局乃劉吳惠蘭，曾蔭權之嫡系。在僅有一年任期之時間，提出如此草案，是否意欲為2012年之新任特首及政府添亂，實在難以猜度。唯有一點可以認定，要是此等草案在當今商務及經濟發展局局長， 貴黨黨友蘇錦樑在任期間通過，做成上述所提及之不良影響，難免成為蘇先生乃至 貴黨之污點。

再者，中央現時要面臨之挑戰乃二十年來僅見，黨中央有換屆及”倒薄”鬥爭，各地維權鬥爭之風日盛，疆獨藏獨之風熾熱，甚至經濟硬着陸、南海週邊關係緊張及美國重返太平洋戰略，都對中央有莫大麻煩。如今草案又將港人變得驚恐，甚至不得不激烈鬥爭，實在不合中央對香港繁榮穩定之期許。

因上述影響，不才反對草案中授權政府檢控網上侵權，尤其是二次創作，更希望 貴黨能爭取豁免二次創作。以現時政府之勢孤力弱， 貴黨定必能成功爭取。對 貴黨而言，豁免二次創作不但能避免之前數段的惡果，還有以下的好處。

第一， 貴黨如果要以更穩固權力基礎管治香港，或者促成香港各界大和解，就必須洗脫過往與相當多港人，尤其網民對立之形象。在不才眼中，網民雖然惡搞諸君甚力，但如 貴黨展示維護香港自由，促進民主，真正做到民主建港，則不但網民，而且大部分市民均必心悅誠服，最少不致加入激進派。而成功爭取”豁免二次創作刑事化”，就是改變形象的第一步。

第二，現時民主黨依然贊成草案，公民黨只是棄權，泛民兩黨之取態已經逐漸令網民支持者離心。 貴黨如果成功爭取”豁免二次創作刑事化”，可以將當中不少支持者拉過來，而不會令草案被否決。只要行動迅速，就可以先聲奪人，令其他黨派陷入被動。

第三， 貴黨在香港成功令政府取消一項致亂條款，不但港人歡迎，中央亦會為諸君消除曾蔭權弊政，成功維護香港穩定而對 貴黨青眼有加。而且香港必須保持自由，才能成為外資進入內地，內地企業走出國際的橋樑，這也是先任領導人對香港”長期利用”的真義。

不才僅一區區網民，並非 貴黨成員，但見諸君不斷為港人謀福祉，連地盤工程外也提醒市民小心過馬路，與及成功爭取行人燈號綠燈延長兩秒等，可謂無微不至，故仍然相信諸君真有民主建港的精神。因此，盼 貴黨能再次成功爭取”豁免二次創作刑事化”，革除曾蔭權時代弊法，保護網民之言論自由。

網民 陳志浩 謹啟

吳起隨想

喺小弟同朋友一齊搞嘅"無聊聊聊"論壇仔入面，有網友(姑且稱爲網友D)提到，中國國勢強盛，反共只會令外國勢力入侵，而且中共倒臺中國就會出現權力真空，分裂割據咁話。於是我就諗，究竟乜嘢情況下，中共會打仗？中共嘅權力基礎係咪咁穩固？然後，就聯想起吳起呢位戰國兵家。

我最近鍾意睇陳雲老師嘅書同文章，佢經常強調自己係儒門正宗，又話要用現實政治(real politik)去令香港得以城邦自治。咁啱我對先秦兵法同西方戰略思想有些少認識，於是就諗，其實兵法又可唔可以同樣令我哋對現實政治同行動方面，有更好嘅認識呢？在我嚟睇，吳起嘅生平同著作《吳子》應該多多少少幫到手。

以下不妨由網友D嘅意見入手，睇下吳子會點講。

所謂外國勢力入侵，現代已經有好多種形式，由直接出兵攻打，到間諜戰、網絡戰，到經濟侵略同所謂文化侵略都有。不過，由網友D嘅意思嚟睇，佢顯然係指最古老、最明顯嘅入侵方式---打仗。打仗就係古人所講嘅用兵，以下睇睇吳起係點分析：

吳子曰：“凡兵之所起者有五：一曰爭名，二曰爭利，三曰積惡，四曰內亂，五曰因饑。其名又有五：一曰義兵，二曰強兵，三曰剛兵，四曰暴兵，五曰逆兵。禁暴救亂曰義，恃眾以伐曰強，因怒興師曰剛，棄禮貪利曰暴，國亂人疲舉事動眾曰逆。五者之數各有其道：義必以禮服，強必以謙服，剛必以辭服，暴必以詐服，逆必以權服。”（《吳子》圖國第一）

簡單嚟講，吳起認爲，之所以會有戰爭，係有五個原因，同時有五種相應嘅平息方法(服)：

爭名-禁暴救亂-義兵-以禮服
爭利-恃眾以伐-強兵-以謙服
積惡-因怒興師-剛兵-以辭服
內亂-棄禮貪利-暴兵-以詐服
因饑-國亂人疲舉事動眾-逆兵-以權服

呢個小弟姑且稱之爲"五兵論"嘅戰爭起因及平息方法配對，言簡意駭，相信大家就咁睇都會明白。"五兵論"同中共有乜關係？好簡單，只要中共變得強大或者衰弱，就會有機會出現呢幾種戰爭：

爭名：以中共邊界之廣大，同其他國家領土爭議之多，加上中共當政非以仁義、人道治國，只要中共變得強大，冇其他國家可以制衡，中共自然就會出手解決領土爭端、或者以武力"統一"台灣；或者中共變得衰弱，無力阻止入侵，咁各國就會以禁暴救亂嘅名義出兵攻打。

爭利：領土爭端除咗所謂"神聖不可侵犯"，好多時更有利益關係，例如釣魚臺就有東海油氣田開發嘅考慮。爲此美日磨刀霍霍，自然不過。

積惡：中共對鄰國嘅外交政策，頗有以鄰爲壑嘅意味，例如開發湄公河上遊水力發電，就會令下遊緬甸、越南等國生態受損，更唔需要提雙非嬰對香港及北美地區孕婦利益嘅損害；對國內少數民族嘅政策，好多時相當霸道，大家都明白西藏同新疆喺中共治下，實行漢化政策對藏民及維吾爾人係幾殘暴。咁嘅情況下，只要中共有明顯崩潰嘅跡象，鄰國會因積怨興兵，機會頗高。

内亂：呢點可以稍加解釋。吳起認爲内亂即係"棄禮貪利"，當中"禮"嘅意思相當空泛，但大致嚟講，係講國内與國際間嘅秩序同規矩。所以佢嘅意思，用現代語言講，即係當國內外嘅秩序同權力均衡崩潰，當政者就會爲舒緩國內壓力而出兵，順便混水摸魚拎着數，近代史上拿破侖同希特拉就係呢類乘勢而起嘅獨裁者。既然我都講到拿破侖同希特拉，咁將來中共現有秩序崩潰，出現陳雲老師所講"中國急促民主之後，很有可能滑入法西斯軍國主義，由「中共法西斯」變成「中國法西斯」"(香港城邦論P.052)，大家就明白點解會打大仗喇。

因饑：當中共治下秩序全面瓦解，去到連基本糧食、自然資源都冇辧法滿足大陸人需要，就會出現而家非洲多個國家瓦解之後嘅連年内戰同對外劫掠。

既然以吳起嘅理論同中共嘅業績嚟睇，將來中共不論繼續崛起直至變成霸權，抑或由盛轉衰，都好大機會出現戰爭，咁跟住落嚟，就要睇下中共會係好似網友D咁講"自鴉片戰爭以來,中國國勢未有今日之強盛者"，還是只係沙上嘅樓閣，權力基礎不穩呢？

吳起認爲，國家要強盛，要戰勝攻取，最重要係君民和，親賢能遠不肖等。以佢自己嘅説話講，就係以下兩段，皆出自《吳子》圖國第一:

"昔之圖國家者，必先教百姓而親萬民。有四不和：不和於國，不可以出軍；不和於軍，不可以出陳；不和於陳，不可以進戰；不和於戰，不可以決勝。是以有道之主，將用其民，必先和而造大事。...民知君之愛其命，惜其死，若此之至，而與之臨難，則士以進死為榮，退生為辱矣。"

"君能使賢者居上，不肖者處下，則陳已定矣；民安其田宅，親其有司，則守已固矣；百姓皆是吾君而非鄰國，則戰已勝矣。"

當今之勢，中共正正就係倒行逆施，同吳起呢兩段教訓背道而馳。中共對人民生計、人權嘅關注不周，甚至幹部殘民自肥亦不嚴加懲處(不爲？不能？)，自然變成"不和於國"。所謂和諧，點會係靠把口或者靠網絡長城咁簡單？以中共而家嘅治國之道，點可能做到"士以進死為榮，退生為辱"？

中共縱容地方幹部殘民，地任圈樓任拆，而且升遷惟GDP是尚，點可以做到"使賢者居上，不肖者處下"，"民安其田宅，親其有司"，人民又點會真心"是吾君而非鄰國"呢？

因此，如果吳起今日復活，親眼目睹中共嘅弊政，睇怕只會用"成湯討桀而夏民喜悅，周武伐紂而殷人不非"（《吳子》圖國第一）嚟形容將來會大舉進攻中共嘅國家，而中共呢，自然會好似夏桀同商紂一樣敗亡，過程幾近兵不血刃。

最後，引用吳起對魏武侯嘅勸戒，結束本文。(見《史記卷六十五 孫子吳起列傳》)

"魏文侯既卒，起事其子武侯。武侯浮西河而下，中流，顧而謂吳起曰：「美哉乎山河之固，此魏國之寶也！」起對曰：「在德不在險。昔三苗氏左洞庭，右彭蠡，德義不修，禹滅之。夏桀之居，左河濟，右泰華，伊闕在其南，羊腸在其北，修政不仁，湯放之。殷紂之國，左孟門，右太行，常山在其北，大河經其南，修政不德，武王殺之。由此觀之，在德不在險。若君不修德，舟中之人盡為敵國也。」武侯曰：「善。」"

如果中共由中央至地方所有幹部都明白"在德不在險"，"若君不修德，舟中之人盡為敵國也"嘅道理，則事或尚有可爲；否則，恐怕終不免三苗、夏桀、殷紂嘅命運。