健康

喺遙遠嘅未來，有個遙遠嘅銀河系…

自從831個週期之前，gnok ohgn 政府實施全民機械化以來，當地人以為所有疾病都已經消滅左；機械身體唔會被生物感染，而且透過內置分子機器修服受損部分，以及機械身體每隔3個週期就必須更換，否則會迅速變脆，最後無法運作嘅設計，更加連機械嘅問題都難以產生。

但係，上一個週期，因為gnok ohgn政府試圖修改法例，令rcp國可以控制機械身體管理局，所以當地出現一啲示威浪潮，結果政府剝奪左幾百人更換身體嘅權利之後，先平息咗示威…

"阿莊，點解會搞成咁？"阿阻自雖然同其他gnok ohgn人一樣，用緊機械身體，但係面部表情依然豐富，因為幾百個週期之前，機械身體嘅先進結構，已經可以模擬幾乎全部生物人類行為。"我地間餐廳生意差成咁，就黎俾政府釘牌！"阿阻自打開雞頭酒機，然後將幾個五顏六色嘅化學品膠囊放入去；機器下面，就開始有雞頭酒滴落隻膠杯度。

"咁都無計架，都無客！唔係事必要食野架嘛！你估叉電同上網咩！"阿莊一路切菜，一路呻："政府話而家有傳染病喎，多過兩個人聚集就會中招，仲禁埋堂食，挑，機械身體都會有病？"阿莊將切好嘅菜倒入烹飪機，然後烹飪機嘅屏幕出現指示："尚欠1500克模擬牛肉碎"

於是阿莊攞起塊模擬牛肉，放入絞肉機。呢個時候門鐘響起，阿莊出去應門。

"唔該一盒芝蛋汁煙肉麵。"阿拍斥向阿莊口頭落單。然後，雙方嘅錢銀交易已經自動完成，阿莊於是同阿拍斥寒喧幾句，講下機械寵物同星際旅行---之後，阿莊不知不覺流淚。

"呢半個週期，政府話電子寵物有病，就沒收晒佢哋，話其他星球啲病仲勁，就禁埋星際旅行，而家連堂食都禁埋…但啲人仲係有病！咁點算呀？"

"阿莊，唔好咁，俾人見到以為你又有病。"阿拍斥托一托眼鏡，再拍一拍阿莊個膊頭，咁樣講。因為佢係機械身體管理局嘅高層，所以阿莊即刻抹乾眼淚，然後喺出菜口拎個金屬盒俾阿拍斥。

xxxxxxxxxxxxxxxxxxxxxxx

阿拍斥返到A旋臂星際展覽廳。其實呢半個週期以來，都無任何展覽，而最近展覽廳就用左黎做"醫院"---一種幾百個週期以來都無出現過嘅場所。

"醫院"嘅"病房"有幾百個，由出面睇係透明嘅，但喺裡面就望唔到出面。大部分"病人"都係瞓喺床上面，其實外表無乜唔妥，只係有人經過嘅時候，容易破口大罵"我無病，做乜困住我呀！"

偶然有"病人"想衝出去，結果就會喺病房嘅邊界觸電，然後向後跌低，之後靜左---咁係因為機械身體嘅數碼腦，因為電擊而暫時熄機，以免程式受損。

阿拍斥黎到一間"病房"，去揾一個編號229LYC嘅"女病人"。呢間"病房"除左229LYC，仲有幾個"護士"看守住。229LYC樣貌比較清純，但係雙手被鐵鏈縛喺床頭，一見阿拍斥，就不停狂鬧，"你個卜乖，做乜又黎呀，做咁能多衰野，因住下年無得換身呀…"

幾個"護士"想將一個綠色波塞入229LYC嘅口度，佢即刻想合實個口，但係始終俾"護士"撬開左；個波塞住佢個口，之後佢就搏命掙扎，但始終掙脫唔到鐵鏈。阿拍斥入左黎，一叫"閂門"，"病房"外面即時變成不透明白色。

幾分鐘之後，阿拍斥叫"開門"，然後拉返好條褲。229LYC已經郁都唔郁，而"護士"就企喺兩邊，望住阿拍斥喺數碼腦入面更新紀錄---"229LYC經衝擊治療後，病情仍然嚴重，預計將因病不能更換身體，建議運往高度設防設施隔離"

之後，佢行出病房，開始諗下聽日去napja旅行要執嘅行李。

"我好滿意政府同而家嘅生活，所以我好健康，嘻嘻…"

❨完❩

❨以上為虛構故事❩

香港三劫

劫，就係無得避，只能硬食。

香港人嘅前路，有三個大劫，一個比一個深，一個比一個大。

第一劫：港共同中共嘅愚蠢惡政，導致香港連同中國一齊被孤立。事實上，呢一劫我地早已深陷其中，而且大多數人未必可以過到。

吳子云：凡兵之所起者有五：一曰爭名…三曰積惡…。其名又有五：一曰義兵，…三曰剛兵…。禁暴救亂曰義…因怒興師曰剛…。五者之數，各有其道：義必以禮服，…剛必以辭服

現時中西交惡，固然有實力對比改變嘅形勢問題，但激發爭端嘅原因，仍然係雙方互相討厭。特別係中國國內嘅半內聯網，經常討論擊敗美國之後，我地要點點點報復，加上中共迫害異見及異族嘅紀錄，與及海外中國人嘅劣行，要西方人唔對中國人起戒心，根本無可能。西方對中國出手，豈不是如吳子所云，因怒興師？中共港共國內種種嚇，燒，拆，捉，打，姦，殺，棄，豈不是西方禁暴救亂嘅好理由？

中國如果想避開同西方嘅爭端，一方面應改過自新，停止煽動對外國同國內異見、異教、異種嘅仇恨，另一方面應按吳子嘅建議，對外國人重新以禮相待，對西方政府好言相勸，盡可能改善外國對中國嘅形象。但顯然佢地行左相反嘅方向。所以香港人嘅孤立劫，注定避唔開。

第二劫：氣候變化帶黎全球糧食減產。

如果第一劫係中國同西方各自蓄謀已久嘅結果，咁第二劫就係全世界過度發展嘅後果。

人類活動帶來氣候變化嘅證據愈來愈多，由於本人並非相關學科出身，故此冇辦法喺度詳細探討。但係氣候變化帶來氣溫及降雨量嘅變化，自然會影響農業收成，而按照現時嘅主流意見，應該都係壞嘅影響。

當然，全球糧食減產暫時仍未發生。按照聯合國糧食及農業組織嘅數字，近十年嘅穀物產量同庫存量總體上都係上升緊。（見 http://www.fao.org/worldfoodsituation/csdb/zh/ ）。但係如果主要嘅農產品出口國，例如美國或者巴西，出現顯著嘅氣候變化，導致農業受到嚴重打擊，將會禍及全球。譬如2019/20年嘅穀物產量如果下跌一成，而利用量並冇減少---而既然全球人口仍然增加，似乎都根本唔會減少---咁樣預計嘅穀物庫存量，就會由9億噸大跌至6.5億噸。咁樣已經足以導致全球穀物期貨大漲價。如果之後2年，4年，都仍然有咁嘅缺口呢？

假如全球暖化嘅趨勢呢個世紀都無法遏止---而呢個正正就係普遍嘅預期，就算之前嘅巴黎協定可以達成，2100年全球都會升溫攝氏4度---咁全球糧食大幅減產就會出現。

而且全球糧食減產，並非好似某啲人預期咁，同全球温度上升成比例。正好相反，因爲農業已經高度機械化同科學化，所以由種子開始，到農藥、化肥、燃料、機器，都極之依賴全球物流網絡。只要少數環節出現問題，就會影響某地嘅農業產能。而某地農業產能大跌，可能會導致社會動盪，反過來又影響鄰近地區嘅物流同生產......譬如湄公河流域嘅國家，已經面臨中國喺上游築壩影響湄公河流量嘅問題，如果未來氣候變化導致降雨量再下降，勢必危及稻米生產，最後限制出口，令世界大米供應緊張。結果可能會引起中國及整個東南亞嘅糧荒……

氣候變化糧食減產造成嘅大範圍災難，喺古代已經發生過。例如公元前12世紀，地中海嘅青銅器文明突然崩潰，可能同連年旱災，飢荒，與及因此而出現嘅海上民族有關---幾十年來農作物一直失收，一方面令流民增加，另一方面削弱列國嘅防衞能力，結果令海上民族（其實係各地海盜同難民嘅合體）破壞咗東地中海嘅貿易，令某啲國家無法輸入糧食及必需品，呢啲國家徹底崩潰，從此消失。

香港喺應對糧食減產方面，基本上無能爲力。因爲香港連最基本嘅農地及農業人口都非常之少，所以糧食無法自給自足。只要農業大國減少糧食出口，香港嘅糧食價格好可能飛漲。經過第一劫---西方孤立之後，香港仲有冇錢喺國際市場搶糧？仲有冇糧俾香港人去搶？經過兩個大劫之後，仲剩返幾多香港人？

上星期講到香港無得避開嘅兩大劫：西方因為中國而孤立香港，與及氣候變化做成世界農業減產。我個人比較悲觀，認為經過呢兩劫，香港已經少左七八成人。但係相比之後呢一劫，都只係小巫見大巫，而且呢一劫係最可悲---人類為左解決前兩劫造成嘅災難，反而陷入更大嘅災劫之中。

第三劫：後人類統治---利維坦時代。

以往人類無論遇到戰爭，飢荒，或者其他災難，即使一無所有，傷亡慘重，最後都會靠自己黎克服困難，重新出發。

但係到左而家，人類嘅科技已經高到一個地步，有機會喺未來製造一種比人類更強大，更高智慧嘅機器或者物種。無論係基因工程，抑或係AI，物聯網，大數據，只要不斷發展，都可以變成人類嘅新統治者。

本來喺人類生活仍然舒適愉快嘅時候，呢啲新科技可能只會用黎醫治癌症，指揮交通，或者幫助政府對付犯罪分子，甚至作軍事用途；呢個時候，人類仍然係造物嘅主人，無論善用抑或惡用，都唔會被控制。

但係，經過兩個劫難之後，人類係咪仲可以舒適生存？還是因為各種物資產量大跌，令全世界人類都深陷苦難之中？

絕望嘅人類，喺貧窮，飢荒，疾病，戰爭當中，希望得到拯救。正如Thomas Hobbes所著<<利維坦>>一書指出，社會要和平，人就要交出權力俾"利維坦"---但係，利維坦唔一定係佢所認為嘅國家。喺科技更高嘅未來，可以係透過基因工程產生，智力極高嘅超級生物❨無論似唔似人❩，或者可以連結所有機器，從而控制全世界嘅超級AI。

一旦呢種新嘅利維坦出現，而人類被統治，則會進入"後人類統治"嘅時代---利維坦時代。至於利維坦會點樣統治，以我區區一個普通人，好難估計；但係，恐怕不外乎令人類毀滅，令人類社會變成動物園，或者以可見及隱藏嘅方式，令人類遵從佢嘅指示。

至於第三劫對香港嘅影響？人類毀滅，或者社會變成動物園，呢兩樣自然係悲慘。即使利維坦想人類整體可以變得更好，但係由於地球資源有限，則每人所消耗嘅資源必定會被逼大大減少，或者直接減少人類數量，因此各地嘅物流運輸必然大減，而香港人口將會被強制減至極低水平---1901年，香港人口唔夠三十萬，可能代表喺有限嘅物流同海外貿易嘅情況下，香港人口嘅極限。

香港太細，而且外向，無力改變未來

如果我唔係香港人，而係美國人或者中國人，就唔會叫呢三個做劫，而只係問題，因為大國可以喺災難發生前作出改變，黎避免災難。但係香港有兩個特點：細，而且係外向型經濟，令香港人無從改變命運。

香港細，人口唔多，而且鄰近中國，於是權力基礎難以擴大，無力係西方與中國之間斡旋；外向型經濟，令香港唔能夠應付稍長時間嘅物流同貿易中斷。至於利維坦，就算香港唔研究，其他大國全部都研究緊呀，仲點走得甩？

香港歷劫之後，恐怕無法復原。既然係咁，作為香港人，只能坦然面對，接受現實，話唔定喺利維坦時代，倖存嘅香港人會有另一番新氣象。

19年區選

或者我講野太難聽，咁好啦，我用好聽啲嘅tone再講，不過可能都係難聽過粗口。

以目前嘅香港政制黎講，區議會選舉應該算係最唔重要，對香港影響層次最低，所以勉強被容忍可以有一人一票嘅選舉。但係，正因為低層次同無咁重要，所以如果想將佢變成正邪大決戰，咁就要做好多附加嘅野。

道理就好似你攞住一舊水，但要喺金行拎到幾十萬嘅頸鍊，咁你最後成功，應該都唔係好關嗰一舊水事一樣---你可能揸槍打劫金行，或者帶個有錢人幫你買。

咁究竟各位，你地想借區議會選票呢一舊水，食乜野大茶飯呢？你地嘅槍，或者有錢佬喺邊呢？如果唔可以靠自己嘅實力，或者外國勢力嘅強大支援，咁究竟點樣令一個管幾條街嘅民政嘅區議會議席，變成正邪大決戰嘅一個重要角色---而本來區議會就唔會有呢種影響全港政權嘅功能---呢個係一個謎，或者就只係一個天仙局。

我唔會叫人特登唔好投，但請回歸現實，回歸基本，畢竟區議會只係處理區內嘅事務而唔係全港事務，然後做區議員有錢收，呢兩個先係事實。所以投票嗰陣，只應考慮邊個做區政比較好，或者你想啲人工俾邊個同唔好俾邊個。其他都只係虛妄嘅幻想。

動機

以下唔係由可行性，而係由動機去分析示威者嘅行動。

如果只想外國出手解圍，其實已經可以返屋企休息，因為西方國家早已計畫逐步制裁中共，而香港已經成為籌碼，要影響外國嘅行動，更需要游說團而唔係武鬥團。

如果想撈舊式嘅政治資本，去選議員，加入政黨，或者扮香港大使，就應該露一露面，慷慨陳辭，然後匿埋或者去外國。而家嗰啲賣…唔係，應該話係唔知香港乜乜物物，就係做緊呢啲，試圖得利，順便影響外國介入方式。

如果想報仇，咁而家未必會出現喺會戰嘅前線，而係等緊機會，去伏擊休班警，落單警員或警車，甚至準備傷害警察子女等，正面尋仇難度好高，唯有用呢啲方式。

如果想癱瘓香港運作，以破壞香港嘅經濟，達到攬炒目的，咁固然可以去會戰嘅前線，但係更可以襯亂或者襯無人，進行破壞活動，逼人罷工。

對以上嘅人黎講，大會戰只係一種未必有效嘅手段，所以未來未必會經常見到佢地。但對以下嘅人黎講，情況就好唔同。

如果想保護屋企，學校或者朋友，唔想俾警察破壞，咁就會集中出現喺相關前線，對警察指罵，砌牆等，至於係咪衝鋒就視乎勇氣或者情緒。呢類人喺前線相當多，送頭嘅亦大多係呢類，因為同上面嗰幾類唔同，佢地係被動咁走入去，未必有戰鬥或者逃走嘅計畫，就算有，喺前線嘅擠逼同混亂環境，好多時都實行唔到，而且本來亦未必捨得走，往往錯過離開嘅時機。

如果無明確動機，只係想做啲嘢表達不滿，俾啲顏色政府睇，或者仍然希望政府順從民意，甚至只係想威，咁亦會出現喺前線，又或者做文宣貼連儂牆。呢類人亦係送頭大戶，特別係最初落場嗰陣，因為佢地並唔係以成敗得失去決定自己嘅行為，加上經驗不足，所以未必會去正確設想面對嘅情景，結果就係走唔切送頭，或者累其他人受傷同被捕。

至於好似我咁，覺得自己荷蘭叻，叫人打游擊戰同恐怖活動，唔好去大戰前線送頭破壞成場鬥爭，衰撚過對家嘅冷血廢中軍屍，當然唔會自己走去前線啦，我呢啲仆街free rider做乜要冒險？勸你地唔好送死已經仁至義盡，做乜要陪死？

港英餘孽·國泰美心

將港英餘孽同國泰美心擺埋一齊，可以話夾硬，但如果由中國嘅角度睇，可能係有關係。今次嘅抗暴之戰，中國對呢兩樣野嘅觀感與及鬥爭，個人猜想可能就係其中一條暗線。

首先講"港英餘孽"。呢個詞，97前後成日聽，但係而家好少講，所以後生仔女唔知係乜，都唔出奇。

睇維基，港英餘孽"其意思指英屬香港時代，執政當局工作或培育出來的公務員、立法局議員、行政局議員；從建制派的觀點來看，是指西方的代理人或西方的傀儡。 " ❨https://zh.m.wikipedia.org/zh-hk/%E6%B8%AF%E8%8B%B1%E9%A4%98%E5%AD%BD❩，睇落好籠統，但或者正因為咁，所以對香港黎講，先至咁大殺傷力。

"港英餘孽"同中國關係最僵嘅時候，就係回歸前中英之間對過渡安排嘅爭論。爭論啲乜，其實喺而家嘅香港人黎講，係過左去嘅問題，但對中國黎講，港英餘孽跟住衛奕信起新機場，中國驚俾英國佬駛晒啲錢；配合彭定康搞普選，又廢除多條法例，中國更認為係喺主權移交前搞破壞，令香港政制喺97前後不能銜接，結果中國另設臨時立法會，七一後立即將彭定康年代廢除嘅惡法還原。甚至當年江湖傳聞，陳方安生係為左做下一任特首，先至過渡做布政司司長，然後就逼走陳方安生。

有鑑於此，中國對港英時代遺留落黎嘅官員同議員，甚至整個制度，都有相當敵意，就不足為奇。但係另一方面，中國又不得不用呢啲舊人去令特區政府維持運作，甚至不得不用"港英餘孽"入面嘅主要成份---AO出身嘅官員去做特首。所以表面上，中國日日都話支持特區政府施政，實際上恐怕並非如此，雙方可能係互相利用之餘又互相厭惡。尤其曾蔭權嘅下場，更令政府中人心寒。

譬如逃犯條例修訂同埋之後嘅鬥爭，由我呢啲街外人睇，唔係只有特區政府同示威者鬥，中國同特區都可能鬥緊，所以林鄭先會喺會議爆大鑊，再有錄音泄漏俾路透社。至於中國就一直暗中逼特區政府企硬，令特區政府無法透過政治方式解決問題。坊間有人認為而家嘅亂局，係特區政府執行中國指示所致，但點解中國要咁指示？可能因為港英餘孽始終係港英餘孽，令人痛恨，最好就係同示威者鬥到兩敗俱傷；點解特區政府會強硬到底？可能因為對中國低能又帶有惡意嘅指示煩厭，所以索性用最殘暴嘅手段，去敗壞中國嘅名聲…

既然中國對理應係自己下屬嘅"港英餘孽"都諸多猜忌，咁對於英資嘅怡和太古，應該都唔會當無野。尤其是，怡和同太古，係揸住一啲香港重要企業，例如怡和手上有惠康，7-11，美心，萬寧，pizza hut，香港Ikea，文華東方酒店等；太古則持有國泰。

可以合理咁懷疑，中國會將呢啲老牌英資當成全面管治香港嘅障礙，畢竟非我族類，其心必異…但係點解呢啲英資會支持所謂"止暴制亂"呢？錢，固然要揾，但更有可能係，面對中國嘅政治威脅，與及國企中資嘅競爭同惡意收購壓力，佢地似乎無辦法唔做馬前卒受靶。於是，就會見到美心太子女高調摟打，與及國泰肉酸炒人。而中資國企呢，就係咁意登下廣告撐政府，然後繼續靜雞雞做生意。結果係，國泰變成沒有國泰，美心就日日裝修。

當然，上面呢啲都只係我個人嘅猜測。但係中國一向都只能用文攻武嚇同銀彈(認真，佢無得唔用，民族主義，極權加個人崇拜，對外人嘅吸引力係零，所以中國嘅軟實力非常疲軟，只要唔自認中國人就好難認同佢地嘅所作所為)，因此被中國威脅嘅人好難無任何動靜，但又敢怒不敢言，只可以含住一口冤氣，做世上最肉酸核突嘅掙扎同反抗。

駁玩膠宣言

呢個玩膠宣言…唉，先唔講點解無革命黨同革命軍，無警察叛變，無外國軍隊，都可以成立臨時政府嘅問題。

宣言第一段就完全錯誤。幾千年來，人類並不喜破舊，只喜懷舊，華夏言必堯舜三代，西方言必希臘羅馬。破舊立新，乃工業革命後始能萌芽之思想。就香港而言，多數港人只怕懷念1989年前蒸蒸日上之過去，多於虛無未知之未來。撰寫及和議此宣言者不認同，不足為奇，但最少要明白不歌頌舊黃金時代，並以此為楷模，則在他人眼中，恐怕只見破壞，難見建立。

全篇宣言，僅第二段較可取。但未引用出處❨美國獨立宣言❩，無心之失乎？有心剽竊乎？

之後篇幅就屬於未有黨就搞革命之錯誤，於理於實皆不通。尤其不取消公安條例與緊急法，反而保留2018年前之條文；又只革除副局長以上官員，如此則警務處長反而能留任，更屬豈有此理。香港之惡政，根源在未有雙普選，但具體運作，則在公安條例及緊急法賦予政府之權力過大，與警察腐敗濫暴。撰寫宣言者，難道欲以舊惡法舊黑警，鞏固臨時政府？

自古以來官逼民反，我從未支持暴政，只對反抗與革命予以同情。但若無正確思想指導，則時代革命非但無法光復香港，反而會將香港推入人間地獄。如果此宣言代表革命主要參與者之思想及意見，則我不得不擔憂未來之情勢。無民心暴政即使推翻，卻代之以得民心之亂政，香港將永不翻身。望革命派中有識之士再仔細思量。